Եւրոպական Միութիւնը առկախեց Ուքրանիոյ հետ ընկերակցութեան համաձայնութեան շուրջ աշխատանքը

«Ռոյթըրզ» լրատու գործակալութիւնը կը հաղորդէ, որ Եւրոպական Միութիւնը դադրեցուցած է Ուքրանիոյ հետ Ընկերակցութեան համաձայնագիրին շուրջ աշխատանքները:
Ըստ գործակալութեան, պատճառը Ուքրանիոյ կառավարութեան ներկայացուցած պահանջներն ու փաստարկներն են, «որոնք ոչ մէկ կապ ունին իրականութեան հետ»:
Եւրոպական Միութեան ընդլայնման հարցերով յանձնակատար Շթեֆան Ֆիւլէ յայտարարեց, որ «Եւրոպական Միութիւնը կ՛առկախէ Ընկերակցութեան համաձայնագիրին շուրջ ուքրանական իշխանութիւններուն հետ աշխատանքը»` աւելցնելով, որ «Ուքրանիոյ նախագահին եւ կառավարութեան` Ընկերակցութեան համաձայնագիրին վերաբերեալ խօսքերուն ու գործերուն միջեւ տարբերութիւնը հետզհետէ կը մեծնայ, եւ անոնց փաստարկները իրականութեան հետ ոչ մէկ կապ ունին»:
Ան նշեց, որ «կարճ ժամանակ առաջ խօսեցայ Ուքրանիոյ փոխվարչապետ Սերկէյ Արպուզովի հետ եւ անոր յայտնեցի, որ երկխօսութեան շարունակման համար պայման է, որ Ուքրանիա յստակ կերպով յայտարարէ համաձայնագիրը ստորագրելու իր յանձնառութիւնը, սակայն պատասխան չստացայ. աշխատանքը առկախուեցաւ»:
Միեւնոյն ժամանակ, երէկ Քիեւի Անկախութիւն հրապարակին վրայ, ուր հազարաւոր մարդիկ հաւաքուեցան, յայտարարուեցաւ «արժանապատուութեան օր»: