Kardinali Sodano: “Të njihet historia e martirëve të komunizmit, në Evropën Lindore”
Javës së kaluar, në Romë, Ambasada e Bullgarisë pranë Selisë së Shenjtë organizoi
një simpozium me temë: “Kisha në Evropën Lindore gjatë komunizmit: ndërmjet martirëve
e rezistencës së heshtur”. Historianë, gazetarë e rregulltarë folën mbi faqet më të
errta të historisë së Kishës në Evropë, gjatë diktaturës komuniste, i njohën të pranishmit
me përpjekjet e politikës ateiste për të kontrolluar të krishterët, katolikë e ortodoksë,
për të futur agjentë në radhët e klerit, për t’i bërë laike festat e për të imponuar
rite civile në vend të Sakramenteve. Faqe e errët, që shndritet nga qëndrimi heroik
i Kishës e i besimtarëve, të cilët mbetën “besnikë të Zotit”, duke i dhënë krishterimit
aradhe martirësh. Qe dekani i kolegjit kardinalor, Anxhelo Sodano, ai që vuri
në dukje se viktimat e Stalinit, sipas disa studimeve, arrijnë në 40 milion, ndër
të cilët, shumë të persekutuar për fenë. “Historia – theksoi kardinali, që pati qenë
Sekretar i Shtetit të Vatikanit gjatë papnisë së të Lumit Gjon Pali II, i cili u bënte
thirrje popujve të mos kishin frikë e të shembnin muret – është mjeshtre e jetës.
Prandaj, duhet të kontribuojmë për t’u bërë të njohur brezave të rinj një faqe të
dhimbshme të popujve të Evropës Lindore, të privuar nga liria fetare e të dënuar të
jetojnë përtej perdes së hekurt, që u ndalonte çdo lloj kontakti me vëllezër të tjerë
në mbarë botën”.