Папа на Сусветны дзень міра: братэрства – аснова міра і шлях да яго
“Братэрства – аснова
міра і шлях да яго” – гэтай тэме прысвечана першае пасланне папы Францішка на Сусветны
дзень міра, які будзе адзначацца 1 студзеня. Святы Айцец адзначыў, што “няўрымслівае
жаданне братэрства” прысутнічае ў сэрцы кожнага чалавека. Братэрства з’яўляецца “важным
вымярэннем чалавека”, а асэнсаванне ўласнай сацыяльнай прыроды “дапамагае бачыць у
іншых людзях нашых братоў і сясцёр і адносіцца да іх адпаведна”. Таму, на думку Святога
Айца, братэрству трэба пачынаць вучыць з сям’і, пакліканне якой: “заражаць свет сваёй
любоўю”. У той жа час, рэалізацыі пакліканню чалавека да братэрства супрацьстаіць
“глабалізацыя абыякавасці”, якая імкнецца прымусіць “паступова прызвычайвацца да пакутаў
іншых, закрываючыся ў сабе”. На думку Пантыфіка, “сучасныя этычныя сістэмы няздольныя
ствараць сапраўдныя сувязі братэрства”, таму што братэрства немагчыма без “спасылкі
да адзінага Айца, як яго вышэйшай асновы”.
Кожны чалавек носіць у сабе пакліканне
да братэрства, але таксама і магчымасць здрадзіць яму, пра што кажа прыклад забойства
Абэля яго братам Каінам. Папа задаецца пытаннем: ці змогуць людзі адказаць на прагу
братэрства, закладзеную ў іх Богам Айцом і ўласнымі сіламі перамагчы абыякаваць, эгаізм
і нянавісць, прыняць законныя адметнасці, якія характарызуюць братоў і сясцёр?
На
яго думку, корань братэрства – у айцоўстве Бога. Крыж стаў “месцам” заснавання братэрства,
якое людзі самі не ў стане стварыць. Такім чынам, жыццё з Хрыстом дапамагае бачыць
у Богу Айца ўсіх людзей і, як наступства, нараджае імкненне жыць братэрствам, лічыць
Папа.
Францішак нагадаў, што братэрства тычыцца не толькі індывідуўмаў, але
цэлых народаў, а самыя паспяховыя з іх павінны памятаць пра абавязак салідарнасці,
сацыяльнай справядлівасці і ўсеагульнай міласэрнасці да менш паспяховых.
У
аснову павінен быць пакладзены клопат пра агульнае дабро, які прадугледжвае адмаўленне
ад “прагі прыбытку” і “прагі ўлады”. Трэба быць гатовымі “згубіць сябе” на карысць
іншага, не эксплуатаваць і прыгнятаць яго дзеля ўласнай выгады, а служыць яму, лічыць
Пантыфік.
На думку Святога Айца, прычына беднасці і “ганьбы голада” – у недахопе
братэрства. Таму, акрамя палітычных мераў, неабходна спрыяць братэрству праз сціплы
і просты лад жыцця. Ён нагадаў пра неабходнасць братэрства ў эканоміцы. Крызіс, выкліканы
паступовым аддаленнем чалавека ад Бога і бліжняга, імкненнем да матэрыяльных дабротаў
і паслабленнем міжасабовых і сацыяльных адносінаў, падштрухнуў многіх шукаць шчасця
ў спажывецтве і прыбытку, якія “пераўзыходзяць усякую логіку здаровай эканомікі”,
заўважыў Пантыфік.
Каб аднавіць братэрства, Папа заклікае адкласці зброю і
ўстаць на шлях дыялогу, спрыяць раззбраенню, асабліва хімічных і ядзерных арсеналаў,
змагацца з карупцыяй і арганізаванай злачыннасцю, клапаціцца пра раўнамернае і адказнае
выкарыстанне прыродных рэсурсаў. Ён падкрэсліў, што “Касцёл шмат робіць ва ўсіх гэтых
сферах, і ў большасці выпадкаў у маўчанні”, але неабходна пашырыць намаганні і памятаць,
што служэнне – гэта “душа братэрства, якое стварае свет”.