Ukrainë: Meshë e ipeshkvijve greko-katolikë në Sheshin Maidan, ndërmjet manifestuesve
Dje paradite, në Sheshin Maidan të Kievit, u kremtua një Meshë Shenjte, ndërmjet manifestuesve.
Në përfundim, thirrja për ndihmë e solidaritet me të gjithë ata, që manifestojnë
në shesh. Meshën e kremtuan ipeshkvijtë greko-katolikë të Ukrainës, të mbledhur këto
ditë në Sinodin e përhershëm. Ngjarjen ia përcolli agjencisë Sir, imzot Sviatoslav
Shevçuk, kryeipeshkëv i madh i Kievit, kryebari i Kishës greko-katolike ukrainase.
Kisha, pohoi kryeipeshkvi, zgjodhi rrugën të jetë “me popullin” e, në këto ditë manifestimesh,
vendosi t’i lërë hapur 24 orë portat e kishave të Kievit, ku vijon një garë e vërtetë
solidariteti, me oferta për strehë e ushqim të ngrohtë, në këtë periudhë të vitit,
kur temperaturat zbresin deri në 9 gradë nën zero. Në shesh, në një çadër fushore,
është vendosur një kapelë me kryq e ikona, ndërsa priftërinjtë janë radhitur përkrah
popullit. Ishte sekretari i Sinodit, ipeshkvi Bohdan Dzhiurak ai, që ua lexoi thirrjen
manifestuesve. Ipeshkvijtë e sinodit shprehën pakënaqësinë e tyre për aktet e dhunës,
kryer nga forcat e policisë dhe të ushtarakëve mbi manifestuesit në Sheshin e Pavarësisë.
“Jemi thellësisht të prekur, shkruhet në thirrje, nga veprimet e forcave të sigurimit
të shtetit në sheshin Maidan, në zemër të Kievit, kryer në errësirën e natës”. Prelatëtdënojnë
haptas çdo përpjekje për kufizimin e të drejtave të qytetarëve, posaçërisht, të së
drejtës për të manifestuar paqësisht. I mbështesin, prandaj, të gjithë ata, që vijojnë
manifestimet dinjitoze në Sheshin Maidan, duke e dëshmuar këtë dinjitet para mbarë
Kombit. Mbështesim me forcë karakterin paqësor të këtij tubimi civil dhe dënojmë çdo
tip dhune, shkruajnë. Ta lusim Zotin e gjithëpushtetshëm të na japë paqe e drejtësi
e të fitojë e vërteta për popullin tonë. Në këtë çast prove të rëndë, fjalët e Jezusit,
që u shpallën në të gjitha kishat tona të dielën e kaluar, na japin shpresë e forcë:
“Mos druaj, ki besim e do të shpëtosh!”.