«Միջքրիստոնէական համախոհութիւն գոյացնելու մեր նախաձեռնութիւնը ցամքելու մօտեցած է,
սակայն մենք պիտի չյուսալքուինք» շեշտեց Ժրայսաթի
Փոփոխութիւն եւ բարեկարգում համախմբումը երէկ Ռապիէի մէջ գումարեց իր նիստը` նախագահութեամբ
համախմբումի նախագահ, երեսփոխան զօր. Միշել Աունի: Նիստէն ետք արդարութեան նախարարի
պաշտօնակատար Սելիմ Ժրայսաթի յայտնեց, որ նիստին ընթացքին քննարկուած է միջքրիստոնէական
համախոհութիւն գոյացնելու իրենց նախաձեռնութիւնը` երկրին քաղաքական, ապահովական եւ շրջանային
թէ միջազգային մարզերուն առումով միացեալ կեցուածքներ որդեգրելու նպատակով: «Միջքրիստոնէական
համախոհութիւն գոյացնելու մեր նախաձեռնութիւնը ցամքելու մօտեցած է, սակայն մենք պիտի
չյուսալքուինք», ըսաւ Ժրայսաթի: Ժրայսաթի անդրադարձաւ Լիբանանեան ուժեր կուսակցութեան
ղեկավար Սամիր Ժահժահի կողմէ տարբեր ժամանակաշրջաններու ընթացքին արտասանուած շարք մը
կեցուածքներու, որոնք խոչընդոտած են միջքրիստոնէական համախոհութեան հաստատումը: Ան
նշեց, որ Ազգային ազատ հոսանք կուսակցութեան երեսփոխաններուն կողմէ երեսփոխանական բոլոր
պլոքներուն հետ ունենալիք հանդիպումներուն շրջագիծին մէջ միակ կողմը, որ մերժած է ընդառաջել
այդ հանդիպումին, Լիբանանեան ուժեր կուսակցութեան երեսփոխանական պլոքն է: «Հետեւաբար
հարց կու տանք, թէ ո՞վ է քրիստոնէական միացեալ կեցուածք գոյացնելու ջանքերը խոչընդոտողն
ու պառակտում յառաջացնողը», ըսաւ Ժրայսաթի: