Ռայի Պատրիարքը կոչ կ՛ուղղէ Մաալուլայի մայրապետները ազատ արձակելու
Մարոնի համայնքի Պշարա Ռայի պատրիարքը երէկ առաւօտեան Պքերքէի մէջ նախագահեց կիրակի օրուան
պատարագին, որուն ընթացքին իր արտասանած քարոզին մէջ կոչ ուղղեց ՄԱԿ-ի ներկայացուցիչներուն
Մաալուլայի մայրապետները ազատ արձակելու: Ան շեշտեց, որ մայրապետները պէտք է վերադառնան
իրենց վանքը կամ որեւէ այլ վանք, որպէսզի կարենան շարունակել աղօթքի եւ Աստուծոյ սիրոյն
նուիրուած իրենց կեանքը: Ռայի պատրիարքը կոչ ուղղեց նաեւ Սուրիոյ պատերազմին հետ առնչուած
երկիրներուն ազատ արձակելու Հալէպի մէջ առեւանգուած երկու եպիսկոպոսները` Եուհաննա Իպրահիմը
եւ Պուլոս Եազիժին, ինչպէս նաեւ հայ կաթողիկէ եկեղեցւոյ միաբաններէն հայր Միքայէլ Քայալը,
յոյն ուղղափառ եկեղեցւոյ միաբաններէն հայր Իսհաք Մահֆուտը եւ Յիսուսեան միաբանութենէն
հայր Փաուլօ Տալոկլիոն: Ռայի պատրիարքը գուժեց Հարաւային Ափրիկէիի նախկին նախագահ
Նելսըն Մանտելլայի մահը` մաղթելով, որ Լիբանանի մէջ իրարմէ գժտուած ղեկավարները Մանտելլայի
օրինակէն իսկական պետական անձնաւորութիւններ դառնալու դասեր քաղեն: