Папа зацвердзіў дэкрэты, падрыхтаваныя Кангрэгацыяй па справах Кананізацыі
9 снежня 2013 г. падчас
сустрэчы з кардыналам Анджэла Амата, прэфектам Кангрэгацыі па справах Кананізацыі,
папа Францішак зацвердзіў дэкрэты, якія тычацца прызнання цуду, мучаніцтва і гераічнасці
цнотаў некаторых кандыдытаў да беатыфікацыі. У першую чаргу, гаворка ідзе пра прызнанне
цуду, здзейсненага праз заступніцтва італьянскай законніцы Джаваніны Франкі, заснавальніцы
Кангрэгацыі Шпітальных Сясцёр Маці Божай Балеснай. Будучая благаслаўлёная жыла ў ХIX
ст. у Кома, на поўначы Італіі, і большую частку жыцця прысвяціла служэнню цяжка хворым.
Таксама Святы Айцец зацвердзіў адзін дэкрэт аб прызнанні мучаніцтва за веру. Гаворка
ідзе пра італьянскага святара з Папскага інстытута замежных місій кс. Марыё Вергара
і свецкага верніка, катэхета, Ісідора Нгей Ко Лата з Мьянмы, забітых у 1950 г. у гэтай
азіяцкай краіне ў выніку антыкаталіцкага пераследу.
Дэкрэты аб прызнанні гераічнасці
цнотаў, зацверджаныя Пантыфікам, тычацца 10 асоб. Сярод іх 4 законнікі: французскі
святар а. Маўрысіа Марыя Матэа Гарыгу, заснавальнік Інстытута Маці Божай Спачування;
нямецкі аўгустыніянін а. Клемент Фюль; венгерскі кармеліт а. Марсэль ад Панны з Кармэлю
і італьянскі трапіст а. Рамана Батэгаль.
Таксама Папа пацвердзіў гераічнасць
цнотаў пяці законніц: с. Разаліі Кадрон-Жэтэ, заснавальніцы Інстытута Сясцёр Міласэрнасці
з Канады; с. Марыі Розы Тэрэзы Гай Цібаў з Іспаніі, заснавальніцы Кангрэгацыі Сясцёр
св. Юзафа з Жыроны; а таксама двух італьянак: с. Орсалы Мезіні, генеральнай настаяцельніцы
Кангрэгацыі Сясцёр Малой Місіі для глухіх і с. Марыі Схаластыкі ад Божага Провіду,
генеральнай настаяцельніцы Кангрэгацыі Сціплых Вучаніц Боскага Настаўніца.
Пантыфік
прызнаў таксама гераічнасць цнотаў свецкага верніка з Пуэрта-Рыка Рафаэля Кардэра
Маліна.