Liturgjia e Fjalës së Zotit - Zoja e Papërlyer, e diela II e Ardhjes
Kur Hyji krijoi burrin dhe gruan, thotë libri i Zanafillës, “Hyji shikoi gjithçka
kishte bërë dhe, ja, ishin shumë të mira” (Zan 1,3). Mirësia e Hyjit
është zanafilla e njeriut, burimi i qenies së tij. Tregimet e mëtejshme të zanafillës
na tregojnë rënien e njeriut dhe hyrjen e së keqes në botë. E keqja e ka mjegulluar
njohjen e Hyjit tek njeriu dhe e ka vënë njeriun në udhën e fshehjes nga Hyji: “Dëgjova
zërin tënd në kopsht dhe u tremba, se jam lakuriq e u fsheha” (Zan 3,10), i thotë
Adami Hyjit në leximin e parë. E mira dhe e keqja janë parë shpesh herë, përgjatë
historisë, si dy forca që luftojnë me njëra-tjetrën dhe herë fiton njëra e herë fiton
tjetra. Fushëbeteja më egër e kësaj ndeshjeje luftarake është shpirti i njeriut. Ky
botëkuptim i të keqes dhe të mirës nuk përkon me zbulimin biblik. Tregimi i Zanafillës
e paraqet të keqen jo si pushtet, por si gënjeshtër: “Më gënjeu gjarpri” (Zan 3,13)
– thotë Eva. I njëjti tregim kumton të ardhmen: “Fara e saj (e gruas) do të ta shtypë
kokën” (Zan 3,15). Gënjeshtra e çon njeriun larg Hyjit dhe, në këtë largësi, njeriu
humb vetëdijen për identitetin dhe zanafillën e vet. E mendon vetveten si qenie pa
Hyj. Kjo gënjeshtër dhe ky mendim e shtyjnë njeriun ose të krijojë hyjni të rreme,
idhuj, që e skllavërojnë, ose të mendojë si ai vetë, njeriu, është hyj. Megjithatë,
asnjë nga përgjigjet, që i ka dhënë njeriu vetvetes rreth Hyjit dhe qëllimit të ekzistencës
së vet, nuk ia kanë sjellë lumturinë dhe paqen. Duke humbur Hyjin, njeriu ka humbur
burimin e lumnisë. Ky është mëkati zanafillor. Në gjendjen e vet mëkatare, njeriu
nuk mund ta shpëtojë vetveten, por mund ta dëshirojë shpëtimin, që vjen vetëm prej
Hyjit. “Hyji dërgoi engjëllin Gabriel në një qytet të Galilesë, që quhet Nazaret,
tek një virgjër, që ishte e fejuar me një njeri, që quhej Jozef, prej fisit të Davidit.
Virgjëra quhej Mari.” (Lk 1, 26-27). Ky fragment nga Ungjilli sipas Lukës na tregon
si ndodhi ngjizja e Jezusit, ndërsa e kremtja e kësaj liturgjie na tregon se Nëna
e Jezusit është krijesa që Hyji e ruajti nga e keqja, për të nisur me të një histori
krejtësisht të re, të themeluar në mirësinë e tij të amshuar. Mirësia hyjnore krijon
e rikrijon. E keqja nuk mund të krijojë, por vetëm të ndotë e të rrënojë. Në virgjërën
Mari shkëlqen njeriu i rikrijuar. Shpëtimi, që ka sjellë Krishti, është pikërisht
ky rikrijim. Toka, prej nga Hyji nxori Adamin e parë, është toka e paprekur nga e
keqja. Toka, prej ku Hyji nxjerr Adamin e ri është gjithashtu tokë e paprekur nga
e keqja, është kraharori i shenjtë i virgjërës së paprekur nga mëkati zanafillor,
i Virgjërës së ngjizur pa mëkat. *** *** ***
Sot është e kremtja e Zojës
së Papërlyer. Në Angli dhe në Normandi festa e ngjizjes së Marisë është kremtuar që
në shekullin XI. Atëherë i kushtohej vëmendje e veçantë rrethanave të mrekullueshme
të lindjes së saj, si, për shembull, faktit që Ana ishe beronjë. Përtej kësaj ane
tregimtare, Shën Anselmi nxori në pah madhështinë e misterit që realizohet në ngjizjen
e Marisë: ruajtja e saj nga mëkati. Në vitin 1443 koncili i Bazelit e shqyrtoi
këtë mister si një të vërtetë të fesë dhe Papa Piu IX e shpalli dogmë në vitin 1854. Hyji
e ka zgjedhur Marinë për shëlbimin e njerëzimit, sepse ka dashur që Shpëtimtari të
jetë “biri i njeriut”. Për këtë arsye Marisë i përshtatet plotësisht fjala që Hyji
i drejtoi tunduesit: “Do të vë armiqësi ndërmjet teje e gruas, ndërmjet farës tënde
e farës së saj: ajo do të ta shtypë kryet” (Zan 3, 15). Maria njihet si Eva e re,
nëna e të gjithë të gjallëve” (leximi i parë). Shfaqet përkrah Krishtit, Adamit të
Ri, prandaj na paraqitet si ajo që na ndihmon të zbulojmë e të respektojmë vendin
e gruas në shpëtimin e njerëzimit. Na kujton dhe nxjerr në pah vendin dhe rolin e
Virgjërës, të nuses, të nënës, të së vesë, në shoqëri, në Kishë e në botë; ajo merr
në mbrojtje dinjitetin e gruas kudo që vihet në rrezik. *** *** ***
Abrahami
ngjizi Isakun, falë besimit në premtimin e Hyjit, dhe “u bë ati i shumë popujve” (shih
Rm 4,18-22). Po ashtu Maria ngjizi Jezusin, me anë të fesë. Ngjizja virgjërore e Jezusit
qe vepër e Shpirtit të Shenjtë, por, nëpërmjet fesë së Marisë. Është gjithmonë Hyji
ai që vepron, por, nëpërmjet bashkëpunimit të njeriut. Të besosh do të thotë t’i përgjigjesh
me besim Fjalës së Hyjit, t’i pranosh shestimet e tij si të ishin tuat dhe t’i nënshtrohesh
me bindje vullnetit të tij, për të bashkëpunuar me të. Feja kërkon gjithmonë besimin
në Hyjin dhe shpalljen e asaj në të cilën besohet, sepse “me zemër besohet për të
arritur drejtësinë dhe me gojë shpallet feja, për të marrë shëlbimin” (Rm 10,10).
Maria, sapo e vërtetoi se Fjala e Hyjit ishte e vërtetë, besoi në ngjizjen virgjërore
të Jezusit dhe besoi edhe në vullnetin e Hyjit për t’i shpëtuar mëkatarët; e dëshiroi
këtë gjë dhe u bashkua me planin hyjnor, duke u përfshirë plotësisht: “Ja, unë jam
shërbëtorja e Zotit, më ndodhtë siç the ti!” (Lk 1,48). Kisha e ka për detyrë të vijojë
në botë misionin amnor të Marisë, misionin për t’i dhënë botës Shpëtimtarin. I krishteri
i sotëm duhet ta përvetësojë planin e Hyjit, “i cili dëshiron që të gjithë njerëzit
të shpëtohen” (1Tim 2,4), duke e shpallur shpëtimin e vet dhe duke u përfshirë plotësisht
në përçimin e shpëtimit tek të tjerët, sepse “kështu lavdërohet Ati im: të jepni fryte
e të bëheni nxënësit e mit” (Gj 15,8). ()
Nga “Fjalimet” e Shën Anselmit,
ipeshkëv
Qielli, yjet, toka, lumenjtë, dita, nata e të gjitha krijesat
që i nënshtrohen pushtetit të njeriut apo i bëjnë dobi atij, ngazëllehen, o Zojë,
se, përmes teje, janë ripërtërirë me shkëlqimin që kishin humbur dhe kanë marrë hirin
e ri e të patregueshëm. Si të vdekura ishin të gjitha gjërat, sepse kishin bjerrë
denjësinë zanafillore për të cilën ishin caktuar. Pikësynimi i tyre ishte t’i nënshtroheshin
sundimit të atyre, të cilëve u takonte t’i ngrinin lavde Hyjit, dhe atyre t’u shërbenin.
Ishin të ndrydhura nga shtypja dhe e kishin humbur gjallërinë, për shkak të atyre,
që ishin bërë shërbëtorë të idhujve, por, për idhujt nuk ishin caktuar. Tani, përkundër,
si të rilindura, ngazëllehen, sepse mbahen falë zotërimit dhe hijeshohen falë përdorimit
të njerëzve, që lëvdojnë Hyjin. U ngazëllyen si me një hir të ri e të paçmueshëm,
kur dëgjuan se Hyji vetë, vetë Krijuesi i tyre, jo vetëm nga atje lart i drejton,
i padukshëm, por edhe, i pranishëm e i dukshëm mes tyre, i shenjtëron, duke i vënë
në shërbimin e vet. Këta të mira kaq të mëdha janë fryti i bekuar i kraharorit të
bekuar të Marisë së bekuar. Falë plotësisë së hirit tënd edhe krijesat që ishin
në ferr ngazëllejnë nga gëzimi se u liruan, ndërsa ato që janë mbi tokë, gëzohen se
u ripërtërinë. Në të vërtetë, me anë të të njëjtit bir të lavdishëm të virgjërisë
sate të lavdishme, galdojnë, të çliruar nga robëria, të gjithë të drejtët që kanë
vdekur para vdekjes së tij gjallëruese, dhe engjëjt lumturohen, sepse qyteti i tyre
i rrënuar është ringritur i ri. O grua, ku hiri është i plotë e i begatë, çdo krijesë
rifiton gjelbërimin, nën përmbytjen e plotësisë sate gufuese. O virgjër e bekuar dhe
e mbibekuar, falë bekimit tënd çdo krijesë është e bekuar nga Krijuesi i vet, dhe
Krijuesi i bekuar nga çdo krijesë. Marisë Hyji i dha Birin e tij të vetëm, që e
kishte lindur nga vetvetja të barabartë me veten dhe që e donte si veten, dhe nga
Maria Hyji trajtësoi Birin, jo një tjetër, por po atë, në mënyrë që, sipas natyrës,
të ishte biri i vetëm e i njëjti bir i përbashkët i Hyjit dhe i Marisë. Hyji krijoi
çdo krijesë, dhe Maria lindi Hyjin: Hyji, që kishte krijuar gjithçka, u bë vetë krijesë
e Marisë, dhe rikrijoi, kështu, gjithçka që kishte krijuar. Edhe pse do të kishte
mundur t’i krijonte të gjitha gjërat nga asgjëja, pas rrënimit të tyre nuk dëshiroi
t’i restauronte pa Marinë. Hyji, pra, është Ati i gjërave të krijuara; Maria nëna
e gjërave të rikrijuara. Hyji është ati i themelimit të botës; Maria nëna e ndreqjes
së saj, sepse Hyji la lindur atë përmes të cilit gjithçka është krijuar, dhe Maria
ka lindur atë, falë veprës së të cilit të gjitha gjërat janë shpëtuar. Hyji ka lindur
atë, pa të cilin asgjë nuk është asfare; e Maria ka lindur atë pa të cilin asgjë nuk
është e mirë. Me të vërtetë me ty është Zoti. Ai deshi që të gjitha krijesat, e bashkë
me to edhe ai, të të detyroheshin shumë ty. *** *** ***
Sot është e
diela e dytë e ardhjes. Leximi i kësaj të diele flet për predikimin e Gjon Pagëzuesit
në Shkretëtirë. Eusebi i Cezaresë, duke komentuar profetin Isaia, flet për domethënien
alegorike të predikimit të Gjonit.
Nga “Koment mbi profetin Isaia” të Euzebit,
ipeshkëv i Cezaresë (Cap. 40, rr. 3. 9)
Zëri i atij që thërret
në shkretëtirë: “Përgatitini udhën Zotit, rrafshojeni, në shkretëtirë, udhën për Hyjin
tonë!” (Is 40,3). Deklaron haptas se gjërat e treguara në këtë kumt, domethënë
ardhja e lavdisë së Hyjit dhe shfaqja e shpëtimit të Hyjit për mbarë njerëzimin, nuk
do të ndodhin në Jeruzalem, por në shkretëtirë. Kjo është realizuar historikisht dhe
fjalë për fjalë, kur Gjon Pagëzuesi predikoi ardhjen shpëtimtare të Hyjit në shkretëtirën
e Jordanit, pikërisht aty ku u shfaq shpëtimi i Hyjit. Në fakt Krishti dhe lavdia
e tij iu shfaqën qartas të gjithëve, kur, pas pagëzimit të tij, u hapën qiejt dhe
Shpirti i Shenjtë, duke zbritur në formën e pëllumbit, u ul mbi të dhe kumboi zëri
i atit, që i jepte dëshmi Birit: “Ky është Biri im i dashur, të cilin e kam për zemër.
Atë dëgjoni!” (Mt 3,17). Por gjithë kjo gjë duhet kuptuar edhe si alegori. Hyji
vinte në atë shkretëtirë, të rrëpirë e të papërshkueshme, që është njerëzimi. Njerëzimi,
në të vërtetë, ishte një shkretëtirë krejtësisht e mbyllur ndaj njohjes së Hyjit dhe
e ndryrë ndaj cilitdo profet të drejtë. Megjithatë, ai zë detyron t’i hapet Fjalës
së Hyjit një udhë drejt tij; urdhëron të rrafshohet trualli i dëmtuar e i rrëpirë
që çon tek ai, që, kur të vijë, të mund të hyjë: Përgatitni udhën e Zotit (shih Mal
3,1). Përgatitja është ungjillëzimi i botës, është hiri ngushëllues. Këta i japin
njerëzimit njohurinë e shpëtimit të Hyjit. “Ngjitu mbi një mal të lartë, o ti që
i sjell lajme të hareshme Sionit; ngrije zërin fort, o ti që i sjell lajme të gëzueshme
Jeruzalemit” (Is 40,9). Më parë është folur për zërin që kumbon në shkretëtirë,
ndërsa tani, me këto shprehje, tregohen në mënyrë pak a shumë piktoreske lajmëtarët
më të drejtpërdrejtë të ardhje së Hyjit dhe vetë ardhja e tij. Në fakt, më parë flitet
për profecinë e Gjon Pagëzuesit e pastaj për ungjillëzuesit. Por cili është Sioni,
për të cilin flasin këto fjalë. Sigurisht ai që dikur quhej Jeruzalem. Edhe ai ishte
një mal, siç pohon Shkrimi, kur thotë: “Mali i Sionit, ku e ke vënë banesën” (Ps 73,2);
dhe Apostulli: “I jeni afruar malit të Sionit” (Heb 12,22). Por, në një kuptim më
të lartë, Sioni, që bën të ditur ardhjen e Krishtit, është kori i apostujve, i zgjedhur
nga mesi i popullit të rrethprerë. Po, ky është Sioni dhe Jeruzalemi, që e pranoi
shpëtimin e Hyjit dhe është i vendosur mbi malin e Hyjit: është e themeluar, pra,
mbi Fjalën e njëlindur të Atit. Atij i kërkon që, një herë të ngjitet mbi një mal
sipëror, e pastaj të shpallë shpëtimin e Hyjit. Shëmbëllim i kujt është ai që
sjell lajme të mira, nëse nuk është shëmbëllim i aradhes së ungjillëzuesve? E çfarë
do të thotë me ungjillëzue, përveçse me u sjellë të gjithë njerëzve e, para së gjithash,
qytetit të Judës, lajmin e mirë të ardhje së Krishtit mbi tokë?