Kisha do të ketë tre të Lumë të rinj: atë Vergara e laiku Ngei Ko Lat, martirë të
Birmanisë, si edhe nënë Xhovanina Franki
Papa Françesku priti sot paradite kardinalin Anxhelo Amato, prefekt i Kongregatës
për Çështjet e Shenjtorëve. Gjatë audiencës, Ati i Shenjtë e autorizoi Kongregatën
t’i bëjë publike dekretet për tre të Lumë të rinj. Është fjala për motër Xhovanina
Franki, themeluese e Kongregatës së Murgeshave Infermiere të Zojës së Dhimbshme; martirët
e Birmanisë: Mario Vergara, meshtar i Institutit Papnor për Misionet e Jashtme (PIME)
dhe Izidor Ngei Ko Lat, laik e katekist. Pse jeta e këtyre njerëzve është shembull
për të krishterët? Le ta përvijojmë për secilin me pak fjalë. Atë Mario Vergara
lindi në Fratamaxhore të Napolit, më 18 nëntor 1910, më i vogli ndër nëntë fëmijë.
19 vjeç hyri në Institutin Papnor për Misionet e Jashtme (PIME) e u dërgua në Birmani
në vitin 1934. Mësoi gjuhën e fiseve kariane e pas pak muajsh, shkoi të shërbente
në Çitaçiò, në fisin Sokù, i cili banonte në 29 fshatra. U kthye në një pikë referimi
për të sëmurët, të cilët i kuronte me përkushtim të madh, pavarësisht se mori malarien,
që kthehej shpesh t’i bënte vizitë. Pasi shpërtheu Lufta e dytë Botërore, të gjithë
misionarët italianë, që shërbenin në Birmani, nën protektoratin e Anglisë, u konsideruan
fashistë dhe u detyruan ta ndërprisnin veprimtarinë. Më 21 dhjetor 1941 u dërguan
në kampet e përqendrimit angleze në Indi. Atë Vergara u lirua pas tri vjetësh, pasi
ishte dobësuar jashtëzakonisht e pasi kishte bërë disa operacione, ndër të cilat edhe
heqjen e një veshke. Pavarësisht nga kjo, themeloi një mision tjetër, gjithnjë në
Birmani, duke tërhequr kritikat e protestantëve baptistë. Atë Vergara kundërshtoi
ashpër të gjitha abuzimet e trupave kariane rebele, me fe baptiste, të cilat i merrnin
ushqimin popullsisë dhe vendosnin taksa të papranueshme. Më 24 maj 1950, atë Vergara,
i shoqëruar nga katekisti Izidor Ngei Ko Lat, shkoi të protestonte për një
abuzim, por u arrestua nga spiunët e qeverisë. U vranë të dy në agimin e 25 majit.
Trupat u mbyllën në dy thasë dhe u hodhën në lumin Saluen, për të mos u gjetur kurrë
më. Xhovanina Franki lindi në Komo më 24 qershor 1807, e dyta e shtatë fëmijëve.
Pasi i vdiq i fejuari, vendosi t’ia kushtonte jetën Zotit. Më 27 shtator 1853, 33
vjeçarja, së bashku me tri shoqe, themeloi Bashkimin e Mëshirshëm të Motrave Infermiere
të Bamirësisë. Më 1858 veshi rrobën rregulltare, gjithnjë e ndjekur nga shoqet. Infermieret
e Përshpirtshme, sipas planit fillestar të shën Franòeskut të Sales për Vizitandinet,
asistonin të sëmurët në shtëpi dhe gratë në burgun e shën Doninos. Më pas, motër Xhovanina
shkroi për vete e për simotrat “Metodën e jetës”, rregullën e kongregatës, që u miratua
nga ipeshkvi më 16 korrik 1862. E kaloi jetën duke u shërbyer të sëmurëve, tek të
cilët shihte fytyrën e Krishtit, duke ndërruar jetë ajo vetë më 23 shkurt 1872, nga
lija e dhenve, e cila mbillte vdekje kudo në Komo. Dekretet kanë të bëjnë edhe
me njohjen e virtyteve heroike për 10 Shërbëtorë të Zotit, pesë burra e pesë gra.