Ուքրանիոյ ընդդիմադիր խմբակցութիւնները կը պահանջեն կառավարութեան հրաժարականը
ԻԹԱՐ-ԹԱՍՍ լրատու գործակալութիւնը կը հաղորդէ, որ Ուքրանիոյ ընդդիմադիր երեք խմբակցութիւններ
կը պահանջեն վարչապետ Նիքոլայ Ազարովի ղեկավարութեամբ ուքրանական կառավարութեան հրաժարականը:
Այս կեցուածքը խորհրդարանին մէջ յայտարարած են Արսէնի Եացենիուք, Վիթալի Քլիչքօ եւ Օլեկ
Թիակնիպոք: «Ատիկա մեր առաջին պահանջն է: Երկրորդ պահանջը քաղաքական ճնշումներու դադրեցումն
է, այսինքն` Եուլիա Թիմոշենքոյի եւ Քիեւի մէջ ցոյցերու ընթացքին ձերբակալուած երեք գործիչներու
ազատ արձակումը», ըսած է «Պաթքիվշչինա» խմբակցութեան ղեկավար Արսենի Եացենիուք: Ան
մերժած է խորհրդարանի նախագահ Վլատիմիր Ռիպաքի` երկրին մէջ ստեղծուած իրավիճակը կլոր
սեղանի շուրջ քննարկելու վերաբերեալ նախաձեռնութիւնը: «Մենք արդէն կլոր սեղանի նստած
ենք, երբ համաձայնած էին ընդունիլ համարկման մասին օրէնքը», ըսած է ան: Այդ պատճառով
ալ ընդդիմութեան ղեկավարները նպատակայարմար չեն նկատեր շարունակել նիստին մասնակցութիւնը:
«Մենք կ՛երթանք եւրոպական հրապարակ, որովհետեւ այնտեղ շատ աշխատանք կայ կատարելիք», ըսած
է ընդդիմադիր գործիչը: Ան յայտնած է, որ մօտիկ ապագային ընդդիմադիրները պիտի հանդիպին
Ուքրանիոյ մէջ հաւատարմագրուած դեսպաններուն: Հազարաւոր ցուցարարներ երէկ Քիեւի մէջ
պաշարեցին կառավարութեան շէնքը եւ փակեցին անոր առաջնորդող ճամբաները` իբրեւ բողոք կառավարութեան
Եւրոպական Միութեան հետ Ընկերակցութեան համաձայնութիւնը ստորագրել մերժելուն դէմ: Բազմաթիւ
նախարարներ չկրցան հասնիլ իրենց գրասենեակները եւ ստիպուած վերադարձան իրենց բնակարանները: Ուքրանական
կառավարութեան բանբեր Վիթալի Լուքիանինքօ յայտնեց, որ «իշխանութիւնները երկրին մէջ արտակարգ
դրութիւն պարտադրելու մասին չեն մտածեր»: