Զրոյց քառասուներկրորդ–Գլուխ Գ.­ԿԸ ՀԱՒԱՏԱՄ
ՍՈՒՐԲԵՐՈՒ ՀԱՂՈՐԴԱԿՑՈՒԹԵԱՆ

Հարցում թիւ 146. Ի՞նչ կը նշանակէ Սուրբերու Հաղորդակցութիւն։
Բոլոր այն մարդիկն ու կիները որոնք իրենց յոյսը դրած են Քրիստոսի վրայ եւ կը պատկանին իրեն` մկրտութեամբ, ըլլան անոնք ողջ թէ մեռած, մաս կը կազմեն Սուրբերու հաղորդակցութեան։ Որովհետեւ մենք կը կազմենք մէկ մարմին Քրիստոսի մէջ, կ՛ապրինք հաղորդակցութեան մը մէջ որ կ՛ընդգրկէ երկինքն ու երկիրը։
Եկեղեցին աւելի մեծ է եւ աւելի կենսունակ քան ինչ որ կը կարծենք. Անոր մաս կը կազմեն անձեր, ողջ ըլլան թէ մեռած ­ այս վերջինները կրնան գտնուիլ քաւութեան շրջանի մը մէջ, կամ արդէն աստուածային փառքին մէջ ­, անձեր որոնք հանրածանօթ են կամ բոլորովին անծանօթ, մեծ սուրբեր եւ համեստ անձնաւորութիւններ։ Մահուընէ անդին, կրնանք իրարու օգնութեան հասնիլ. Կրնանք բարեխօսութիւնը խնդրել այն սուրբէն որուն անունը կը կրենք, կամ մեր նախընտրած սուրբերէն, սակայն նաեւ ազգականներէ որոնք մահացած են եւ զոր կը կարծենք թէ արդէն Աստուծոյ մօտն են։ Փոխադարձաբար, մենք եւս կրնանք օգնութեան հասնիլ մեր ննջեցեալներուն, որոնք քաւութեան շրջանի մէջ կը գտնուին, աղօթելով իրենց համար։ Այն ինչ որ իւրաքանչիւրը կը կատարէ կամ կը կրէ, Քրիստոսի մէջ եւ իրեն համար, կը ծառայէ հասարակաց բարիքին։ Սակայն դժբախտաբար ասիկա (Սուրբերու հաղորդակցութիւնը) կը նշանակէ նաեւ թէ ամէն գործուած մեղք կը վիրաւորէ բոլոր հասարակութիւնը։

Հարցում թիւ 147. Ինչու՞ Մարիամ այդքան գերազանց դիրք մը կը գրաւէ սուրբերու հաղորդութեան մէջ։
Մարիամ Աստուծոյ մայրն է։ Երկրի վրայ` ան ունեցաւ բացառիկ կապեր Յիսուսի հետ. Այս մօտիկութիւնը չի դադրիր երկնքի մէջ. Միեւնոյն ատեն ան մօտ է նաեւ մեզի իր մայրութեամբը։
Որովհետեւ ան ինքզինք ենթարկեց, մարմնով եւ հոգուով, այնպիսի արկածախնդրութեան մը որ վտանգըաւոր էր եւ փորձալից, հակառակ աստուածային ըլլալուն, Մարիամ ընդունուեցաւ երկնքի մէջ իր մարմնով եւ հոգուով։ Այն որ կ՛ապրի եւ կը հաւատայ Մարիամի նման, երկինք կ՛երթայ։


Զրոյց քառասուներկրորդ–Գլուխ Գ.­ԿԸ ՀԱՒԱՏԱՄ
ՍՈՒՐԲԵՐՈՒ ՀԱՂՈՐԴԱԿՑՈՒԹԵԱՆ

Հարցում թիւ 148. Մարիամ կարո՞ղ է իսկապէս օգնել մեզի։
Այո՛. Թէ Մարիամ կարող է օգնել մեզի, այս նիւթին շուրջ Եկեղեցին փորձառութիւն ունեցած է իր ծագման օրէն իսկ։ Միլիոնաւոր քրիստոնեաներ կրնան ասոր մասին վկայութիւն տալ։
Որպէս մայր Յիսուսի` Մարիամ նաեւ մեր մայրն է. Լաւ մայր մը միշտ կը պաշտպանէ իր զաւակը. Եւս առաւել` Մարիամ, մեր մայրը։ Երկրի վրայ արդէն ան միջամտեց Յիսուսի մօտ ուրիշ անձերու ի նպաստ, Կանայի հարսանիքին, զոր օրինակ, թոյլ չտալու համար որ հարսնեւորները սեւերես դուրս գային։ Հոգեգալստեան օրը` վերնատան մէջ էր, առաքեալներուն հետ, աղօթելով իրենց միջեւ։ Որովհետեւ իր սէրը անսահման է, ապահով կրնանք ըլլալ որ ան կը միջամտէ մեզի ի նպաստ մեր կեանքի երկու ամենակարեւոր պահերուն, Հիմա եւ մեր մահուան ժամուն։

Հարցում թիւ 149. Կարելի՞ է պաշտել Մարիամը։
Ո՛չ. Միայն զԱստուած կարելի է պաշտել. Սակայն կրնանք յարգել Մարիամը, որպէս Տիրոջ մայրը։
Պաշտել կը նշանակէ խոնարհաբար եւ առանց պայմանի ընդունիլ բացարձակ գերակայութիւնը Աստուծոյ ամէն արարածի վրայ. Արդ Մարիամ մեզի պէս արարած մըն է։ Մեր հաւատքին համաձայն` ան մեր մայրն է եւ մենք պարտինք պատուել մեր ծնողքը, ըստ Սուրբ Գրքի ցուցմունքներուն։ Արդարեւ Մարիամ կ՛ըսէ ինքիրեն համար. Այո՛, ասկէ ետք` բոլոր սերունդները զիս երանելի պիտի հռչակեն (Ղուկաս 1,48)։ Եկեղեցին կ՛արտայայտէ իր յարգանքը Մարիամի հանդէպ մասնաւորաբար ուխտատեղիներու մէջ, ծիսական տօներու ընթացքին, շարականներով եւ աղօթքներով, ինչպէս զոր օրինակ սուրբ Վարդարանով, որ համառօտութիւն մըն է Աւետարաններուն։