«Յանձնաժողով 50»-ը, որ կոչուած է ուղղումներ կատարելու Եգիպտոսի հիմնական օրէնքին մէջ,
Դեկտեմբեր 1-ի լոյս 2-ի գիշերը հաստատած է երկրի սահմանադրութեան նոր նախագիծը: Այս մասին,
ըստ PanArmenian.net-ի, յայտարարած է յանձնաժողովի ղեկավար Ամր Մուսան: Նախագիծը կը
պարունակէ 247 յօդուած, յառաջիկայ երկու օրերուն անիկա պիտի ներկայացուի Եգիպտոսի ժամանակաւոր
ղեկավար Ատլի Մանսուրի հաստատման, իսկ յետոյ պիտի դրուի համաժողովրդական հանրաքուէի: Ըստ
Մուսայի, փաստաթուղթը կ’ենթադրէ, որ ընտրութիւնները երկրի մէջ պիտի անցնին հանրաքուէով
սահմանադրութեան հաստատումէն վեց ամիս անց: Յանձնաժողովի անդամներուն մեծ մասը քուէարկած
է սկիզբը նախագահական, յետոյ միայն խորհրդարանական ընտրութիւններ իրականացնելու օգտին:
Մինչ այդ Մուսան կը յայտարարէր, որ նոր սահմանադրութիւնը, եթէ անիկա ընդունուի, պիտի
վերադարձնէ Եգիպտոսին անոր մեղմ ուժն ու դերը, որ վերջինս ունէր աշխարհի մէջ: