Папа расказаў пра сваё бачанне ролі Касцёла ў Нідэрландах
Пантыфік прыняў 2
снежня 2013 г. галандскіх іерархаў, якія прыбылі ў Рым з візітам “ad limina Apostolorum”.
Ён нагадаў, што Касцёл павінен рэагаваць на праблемы людзей, “якія адчуваюць трывогу
і роспач перад будучыняй” і заклікаў галандскіх біскупаў, каб разам са сваімі святарамі
суправаджалі людзей, “якія пакутуюць ад духоўнай пустаты і шукаюць сэнс жыцця”, і
“дзяліліся з імі надзеяй, радасцю, здольнасцю працягваць ісці”. Касцёл, падкрэсліў
Папа, “не толькі прапануе нязменныя маральныя праўды”, але дае іх “як ключ да чалавечага
дабра і сацыяльнага развіцця”. Таму “выхаванне сумлення”, паводле яго, становіцца
ў наш час прыярытэтам. Папа “настойліва рэкамендаваў” біскупам рэагаваць на гэту патрэбу
і далучыць да гэтых намаганняў свецкіх вернікаў. Францішак лічыць, што Касцёл у Галандыі
павінен “прысутнічаць у публічных дэбатах, ва ўсіх сферах, звязаных з чалавекам”,
“па найважнейшых сацыяльных пытаннях, напрыклад, сям’я, сужэнства, заканчэнне жыцця”.
Пантыфік
запрасіў каталіцкую супольнасць у Нідэрландах не забывацца пра маладых хрысціян, якія
павінны мець магчымасць “якаснай катэхізацыі”, якая падтрымае іх веру і прывядзе да
Хрыста. Ён запэўніў у сваёй малітве за кожную з ахвяр сексуальнага насілля і іх сем’і
і заклікаў біскупаў працягваць падтрымліваць іх. Пантыфік папрасіў не забывацца, што
будучыня і жыццяздольнасць Касцёла ў Нідэрландах залежыць ад наяўнасці святарскіх
і манаскіх пакліканняў.