«Սուրիոյ մէջ զինադադար պիտի չհաստատուի» ըսաւ Իպրահիմի
Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմի «Սի.Էն.Էն.»-ի
հետ հարցազրոյցի մը ընթացքին յայտնեց, որ Սուրիոյ մէջ զինադադար պիտի չհաստատուի: Ան
Սուրիոյ տագնապի երկու կողմերուն կոչ ուղղեց իրենց միջեւ վստահութիւն հաստատելու համար
բռնարարքներու մակարդակը նուազեցնելու, բանտարկեալները ազատ արձակելու եւ կարօտեալներուն
օժանդակութիւն հասցնել: Իպրահիմի յոյս յայտնեց, որ բոլորը ներկայացուած ըլլան «Ժընեւ-2»
միջազգային խորհրդաժողովին` նշելով, որ երկու կողմերը վստահեցուցած են, որ Սուրիոյ տագնապը
զինուորական լուծում չունի: Ռուսիոյ արտաքին գործոց նախարարութիւնը ողջունեց «Ժընեւ-2»-ին
առանց նախապայմաններու մասնակցելու Դամասկոսի որոշումը: Նախարարութիւնը իր հրապարակած
հաղորդագրութեան մէջ աւելցուց, որ Ռուսիոյ նախագահի Միջին Արեւելքի յատուկ պատուիրակ
Միխայիլ Պոկտանով Մոսկուայի մէջ Սուրիոյ դեսպան Ռիատ Հատտատի հետ քննարկած է 22 յունուարին
նախատեսուած «Ժընեւ-2»-ի պատրաստութեան աշխատանքները: Քիմիական զէնքերու տարածման
արգիլման կազմակերպութեան ընդհանուր տնօրէն Ահմետ Օզոմճօ յայտնեց, որ Սուրիոյ քիմիական
զէնքերը փոխադրելու գործողութիւնը գետնի վրայ ապահովական կացութեան պատճառով շարունակ
մարտահրաւէրներ կը դիմագրաւէ: Ան ըսաւ, որ «առնչակից երկիրները, մանաւանդ անոնք, որոնք
կարողութիւնը ունին այդ քիմիական նիւթէն ապահով կերպով ձերբազատելու, կրնան եւ պէտք է
իրենց դերակատարութիւնը կատարեն»: