Папа Францішак: знак канца часоў – забарона на шанаванне Бога
Існуюць “сілы гэтага
свету”, якія жадаюць, каб рэлігія стала выключна “прыватная справай”, але трэба шанаваць
Бога “да канца” – не баючыся пераследу, сцвердзіў папа Францішак падчас ранішняй Эўхарыстыі
капліцы Дому св. Марты 28 лістапада 2013 г. Каментуючы чытанні, якія ў дадзены перыяд
літургічнага года нагадваюць пра канец часоў і выпрабаванні, Пантыфік адзначыў, што
“апошнім выпрабаваннем” будзе “зневажанне веры”, “нібыта трыумф валадара гэтага свету”
і забарона на “шанаванне Бога”. Яно праявіцца праз звядзенне рэлігіі да прыватнай
справы, праз забарону на нашэнне і ўсталяванне рэлігійных сімвалаў, поўную паслухмянасць
уладарам гэтага свету. “Можна будзе рабіць шмат цудоўных рэчаў, але не шанаваць Бога”,
- сказаў Папа. “Забарона шанавання – гэта цэнтр канца. А калі наступіць поўня – “kairos”
гэтага язычніцкага захавання, калі споўніцца час – тады прыйдзе Ён: “І ўбачаць Сына
Чалавечага, які будзе ісці ў воблаку з моцаю і славаю вялікай”. Хрысціяне, якія пакутуюць
у часы пераследу, часы забароны на шанаванне – гэта прароцтва аб тым, што здарыцца
з усімі намі”, - сказаў Папа.
Францішак адзначыў, што калі гэта пачне адбывацца,
трэба “выпрастаць” і “падняць галовы”, бо “блізка перамога Езуса Хрыста”. Папа заклікаў
не баяцца, а быць церпялівымі і давяраць Пану, Які абяцаў збаўленне. “Давер і вернасць
– гэта ласкі, аб якіх мы павінны прасіць на працягу гэтага тыдня”, - сказаў Папа.