Каталіцкі Касцёл дапамагае хворым на СНІД у 116 краінах
Барацьба са СНІДам
да гэтага часу не выйграна, нават некаторыя міжнародныя донары пачалі зніжаць сваю
падтрымку праграм па тэрапіі і лячэнні гэтай хваробы, вызначыўшы для сябе іншыя прыярытэты,
у тым ліку звязаныя з сусветным эканамічным крызісам. Пра гэта заявіў кардынал Оскар
Андрэс Радрыгес Марадзьяга, старшыня каталіцкай дабрачыннай арганізацыі “Caritas internationalis”.
Ён нагадаў, што арганізацыя далучылася ў 116 краінах па ўсім свеце да намаганняў міжнароднай
супольнасці звесці колькасць новых выпадкаў заражэння ВІЧ і смерцяў ад СНІДу да нуля.
1 снежня ва ўсім свеце будзе адзначацца Сусветны дзень барацьбы са СНІДам.
Кардынал
Марадзьяга нагадаў, што гэта мэта “можа быць дасягнута шляхам прафілактыкі і ранняга
лячэння ВІЧ-інфекцый”, над чым “Caritas” вельмі актыўныя працуе дапамагаючы перш за
ўсё дзецям. Праекты арганізацыі ў апошнія некалькі гадоў ахапілі 10 млн. асоб, якія
жывуць у самых бедных краінах. Але гэтага не дастаткова, падкрэсліў іерарх, бо астатнія
18 млн. чалавек па ранейшаму маюць у гэтым патрэбу. Мэта “нуль новых інфекцый” можа
быць дасягнута толькі праз адказныя міжасабовыя адносіны і індывідуальныя паводзіны,
нагадаў ён. Гаворка ідзе перш за ўсё пра “абмежаванне сексуальнай актыўнасці да пастаяннага
і вернага сужэнства паміж мужчынам і жанчынай”, пазбягаючы любога звароту да наркотыкаў.