Kalendari i kremtimeve të Papës Françesku për dhjetorin e janarin
U botua kalendari i kremtimeve papnore për dhjetorin 2013 e janarin 2014.
Takimi i parë është ai, që do të mbahet në orën 17.30, të diel, më 30 dhjetor,
kur universitarët romakë do të thonë, së bashku me Papën, Lutjet e para mbrëmësore
të Kohës së Ardhjes. Të nesërmën, në orën 18.00, Papa Françesku do të vizitojë
famullinë romake të Shën Çirilit Aleksandrin e do të kryesojë liturgjinë eukaristike. Por
çka spikat në kalendar, janë kremtimet festive, duke nisur nga Akti i nderimit të
Papës Françesku tek këmbët e shtatores së Zojës së Papërlyer, në Sheshin e Spanjës,
në orën 16.00 të datës 8 dhjetor, për të arritur tek Mesha e Natës së Krishtlindjes,
në Shën Pjetër, në orën 21.30 të 24 dhjetorit dhe tek Bekimi “Urbi et Orbi”, mesditën
e Krishtlindjes, nga Lozha qendrore e Bazilikës së Vatikanit. Viti do të përfundojë
përsëri në Shën Pjetër, me kremtimin e “Te Deum”, kryesuar nga Papa, në orën 17.00
të 31 dhjetorit, e do të nisë të nesërmën, më 1 janar 2014, në orën 10.00, me Meshën
e Solemnitetit të Nënës së Zotit, së Shenjtnueshmes Virgjër Mari, në përkim me Ditën
e 47-të Botërore të Paqes. Të hënën, më 6 janar, Solemniteti i Dëftimit të Zotit,
Papa Françesku do të kryesojë Meshën, në orën, 10.00, gjithnjë në Bazilikën e Shën
Pjetrit, ndërsa një të diel më pas, më 12 janar, do të pagëzojë disa fëmijë, gjatë
kremtimit tradicional në Kapelën Sikstine, duke nisur nga ora 9.45.