Papa pret presidentin rus Putin: bisedohet për paqen në Siri e në Lindjen e Mesme
dhe për sigurinë e të krishterëve
Situata e rëndë në Siri, paqja në Lindjen e Mesme dhe roli themelor i të krishterëve
në shoqëri, ishin në qendër të bisedimeve të Papës Françesku me presidentin rus Putin,
i cili u prit mbrëmë, për herë të katërt, në Vatikan, pas dy takimeve të tjera, në
vitin 2000 dhe 2003, me Gjon Palin II e, në vitin 2007, me Benediktin XVI.
Biseduan
përzemërsisht Papa Françesku me liderin e Kremlinit, që i solli Atit të Shenjtë edhe
përshëndetjen e Patrikut të Moskës Kirill e i dhuroi ikonën e Zojës së Bekuar, i ndjekur
nga telekamerat duke bërë me devocion shenjën e Kryqit e duke puthur me nderim të
thellë ikonën. “Kënaqësi për marrëdhëniet e mira dypalëshe”: ky ishte bilanci
i vizitës nga ana e Vatikanit. Duke shkëmbyer mendime rreth çështjeve me interes të
përbashkët, biseda u ndalua posaçërisht tek jeta e bashkësisë katolike në Rusi dhe
kontributi themelor i krishterimit në shoqëri, posaçërisht në mbrojtjen edhe promovimin
e vlerave, që kanë të bëjnë me dinjitetin e njeriut, mbrojtjen e jetës njerëzore dhe
të familjes. U fol edhe për situatën e rëndë të të krishterëve në disa zona të botës,
duke i kushtuar vëmendje të posaçme paqes në Lindjen e Mesme e në Siri. Presidenti
Putin e falënderoi Papën për letrën, dërguar G20, mbledhur në Shën Pjetërburg. U nënvizua
edhe urgjenca e përfundimit të dhunës në Siri, për t’i dhënë ndihmën e duhur humanitare
popullsisë e për të favorizuar nisma konkrete në favor të zgjidhjes paqësore të konfliktit,
duke zgjedhur rrugën e dialogut, me pjesëmarrjen e të gjithë përfaqësuesve të feve
dhe të etnive të ndryshme e duke ua njohur edhe rolin e pamohueshëm në shoqëri.