Intervista e Papës me Atë Spadaron - dikasteret romake dhe ekumenizmi
Papa i parë rregulltar pas 182 vjetësh...
Papa Françesku është Papa
i parë që del nga një Urdhër rregulltar pas Gregorit VII, kamaldolez, që u zgjodh
në 1831, para 182 vjetësh. E pyes Papën: "Cili është sot vendi specifik i rregulltarëve
dhe rregulltareve në Kishë?" "Rregulltarët janë profetë. Janë ata që kanë zgjedhur
ta ndjekin Jezusin, duke imituar jetën e tij me bindje ndaj Atit, me varfëri, duke
jetuar në bashkësi dhe në pastërti. Në këtë kuptim, kushtet nuk mund bëhen karikatura,
përndryshe, për shembull, jeta në bashkësi kthehet në ferr dhe pastërtia në një stil
jete prej njerëzish që kanë ngelur pa u martuar. Kushti i pastërtisë duhet të jetë
kushti i pjellorisë. Rregulltarët janë të thirrur për të qenë kryesisht profetë, që
dëshmojnë si ka jetuar Jezusi mbi këtë tokë dhe shpallin si do të jetë Mbretëria e
Hyjit në përsosmërinë e saj. Rregulltari nuk duhet të heqë dorë kurrë nga profecia.
Kjo nuk do të thotë se duhet t'i kundërvihet pjesës hierarkike të Kishës, edhe pse
funksioni profetik nuk përkon me funksionin hierarkik. Flas për një parashtrim gjithmonë
pozitiv, por që nuk duhet të jetë frikacak. Le të sjellim ndër mend çfarë kanë bërë
shumë murgj të mëdhenj e të shenjtë, rregulltarë e rregulltare, që nga shën Antoni
abat. Të jesh profet do të thotë, nganjëherë, të bësh ruido (zhurmë), nuk di si të
them... Profecia bën zhurmë, poterë, dikush thotë 'rrëmujë'. Por në fakt, karizma
e saj është të jetë tharm: profecia shpall frymën e Ungjillit.
Dikasteret
romake, sinodaliteti, ekumenizmi
Duke mbajtur parasysh përmendjen e hierarkisë,
e pyes Papën: “Çfarë mendoni për dikasteret romake?” “Dikasteret romake janë në
shërbim të Papës dhe të Ipeshkvinjve: duhet të ndihmojnë qoftë Kishat e veçanta, qoftë
Konferencat ipeshkvore. Janë mekanizma ndihmës. Në disa raste, kur nuk kuptohen si
duhet, rrezikojnë të bëhen organizma të censurës. Një gjë që bën shumë përshtypje
është numri i padive për mungesë ortodoksie, që vijnë në Romë. Unë besoj se këto raste
duhet të studiohen nga Konferencat ipeshkvore vendore, të cilave mund t’u shkojë një
ndihmë e vlefshme nga Roma. Këto raste trajtohen më mirë në vend. Dikasteret romake
janë ndërmjetësuese, jo ndërmjetëse apo administruese”. I kujtoj Papës se më 29
qershorin e kaluar, gjatë ceremonisë së bekimit dhe të vendosjes së paliumit 34 karqipeshkvinjve
metropolitë, ka pohuar se “rruga e sinodalitetit” është rruga që e bën të rritet Kishën
e bashkuar “në harmoni me shërbesën e parisë (së Papës)”. Pyetja ime, atëherë, është
kjo: “Si mund të pajtohen në mënyrë të harmonishme paria petrine dhe sinodaliteti?
Cilat janë udhët e përshkueshme, duke mbajtur parasysh edhe ekumenizmin?” “Duhet
të ecim së bashku: njerëzit, Ipeshkvi e Papa. Sinodaliteti duhet jetuar në nivele
të ndryshme. Ndoshta ka ardhur koha për ta ndryshuar metodologjinë e Sinodit, sepse
metodologjia aktuale më duket statike. Kjo mund të ketë edhe vlerë ekumenike, veçanërisht
me vëllezërit tanë ortodoksë. Prej tyre mund të mësohet më shumë domethënia e kolegjialitetit
ipeshkvor dhe tradita e sinodalitetit. Orvatja për një përsiatje të përbashkët, duke
parë si qeverisej Kisha në shekujt e parë, para çarjes midis Lindjes e Perëndimit,
do t’i japë frytet kur të vijë koha. Në marrëdhëniet ekumenike është e rëndësishme
kjo gjë: jo vetëm të njihemi mirë, por edhe të pranojmë atë që ka mbjellë Shpirti
i Shenjtë tek të tjerët, si dhuratë edhe për ne. Dua të vijoj përsiatjen mbi mënyrën
e ushtrimit të parisë petrine, që është filluar në 2007 nga Komisioni i Përzier, dhe
që ka sjellë firmosjen e dokumentit të Ravenës. Duhet të vijojmë në këtë rrugë”. Përpiqem
të kuptoj si e sheh Papa të ardhmen e Kishës. Më përgjigjet: “Duhet të ecim të bashkuar,
duke ruajtur larminë. Nuk ka rrugë tjetër drejt bashkimit. Kjo është rruga e Jezusit”. Po
roli i gruas në Kishë? Papa e ka përmendur këtë temë në disa raste. Në një intervistë
ka pohuar se prania femërore në Kishë nuk është shfaqur aq shumë, sepse tundimi i
maskilizmit nuk ka lënë vend që të dalë në pah roli që u takon grave në bashkësi.
Ai është ndalur edhe një herë tek kjo çështje gjatë kthimit nga Rio de Zhanejro, dhe
ka pohuar se nuk është bërë ende një teologji e thelluar e gruas. Atëherë e pyes:
“Cili duhet të jetë roli i gruas në Kishë. Çfarë duhet bërë që të dalë më shumë në
pah sot?”. “Është e domosdoshme të zgjerohen hapësirat e një pranie femërore më
ndikuese në Kishë. I trembem zgjidhjes së “mashkullorisë me fustan”, sepse gruaja
ka strukturë të ndryshme nga burri. Por gjërat që dëgjoj mbi rolin e gruas janë shpesh
të frymëzuara pikërisht nga ideologjia mashkulloriste. Gratë janë duke shtruar pyetje
të thella, që duhen përballur. Kisha nuk mund të jetë vetvetja pa gruan dhe rolin
e saj. Gruaja është e pamënjanueshme për Kishën. Maria, pra një grua, është më e rëndësishme
se Ipeshkvinjtë. Këtë e them sepse nuk duhet të ngatërrojmë funksionin me dinjitetin.
Pra, duhet ta kuptojmë më thellë figurën e gruas në Kishë. Duhet të punojmë më shumë
për të bërë një teologji të thellë të gruas. Vetëm duke hedhur këtë hap mund të përsiatet
më mirë mbi funksionin e gruas brenda Kishës. Gjenia femërore është e domosdoshme
në vendet ku merren vendime të rëndësishme. Sfida e sotme është pikërisht kjo: të
përsiatet mbi vendin specifik që i takon gruas, edhe mu aty ku ushtrohet autoriteti
në rrafshe të ndryshme të Kishës”.