«Ժնեւ-2» Համաժողովը Պիտի Կայանայ 22 Յունուար 2014-ին
Սուրիոյ հարցով «Ժնեւ-2» միջազգային համաժողովը տեղ պիտի ունենայ 22 Յունուար 2014-ին:
Այս մասին տեղեկացուցած է ՄԱԿ-ի գլխաւոր քարտուղար Պան Քի Մուն: Ինչպէս կը հաղորդէ «Արմէնփրես»-ը`
վկայակոչելով արաբական լրատուամիջոցները, Սուրիոյ ընդդիմադիր ճակատը համաձայնած է համաժողովին
մասնակցելու համար ուղարկել փոքր պատուիրակութիւն մը: Պան Քի Մուն երախտագիտութիւն յայտնած
է ԱՄՆ-ին եւ Ռուսիոյ, ինչպէս նաեւ ՄԱԿ-ի եւ Արաբական լիկայի յատուկ բանագնաց Լախտար Իպրահիմիին
համաժողովի կայացման նպատակով ջանքեր ներդնելուն համար: Սուրիական լրատուամիջոցները աւելի
առաջ յայտնած էին, որ հնարաւոր է համաժողովը կայանայ Յունուար 12-ին: Միւս կողմէն
Ժնեւի մէջ կ’ընթանայ ՄԱԿ-ի եւ Արաբական լիկայի մամուլի քարտուղար Լախտար Իպրահիմիի հանդիպումը
ամերիկացի եւ ռուս գործընկերներու հետ: Անոնք կը քննարեն համաժողովին վերաբերեալ հարցեր:
Ռուսական կողմը կը ներկայացնեն Արտաքին գործոց փոխնախարարներ Միխայիլ Պոկտանով եւ Կենատի
Կաթիլովը, իսկ ամերիկեան կողմը` ԱՄՆ-ի ԱԳ նախարարի օգնական Ուենտի Շիրմանը: Մինչ այդ,
Լախդար Իպրահիմի հանդիպում ունեցածէ Սուրիոյ ընդդիմութեան ներկայացուցիչներուն հետ: Ռուսական
ԻԹԱՌ-ԹԱՍՍ գործակալութիւնը նախապէս տեղեկացուցած էր, որ արեւմտեան դիւանագէտի մը խօսքով,
որուն անունը չէ նշուած, «Ժնեւ-2» միջազգային համաժողովի կայանալը այս տարի շատ քիչ հաւանական
է: Ան նաեւ աւելցուցած էր, որ Ռուսիան , ՄԱԿ-ը եւ ԱՄՆ-ն այսօր` Նոյեմբեր 25-ին, պիտի
փորձեն որոշել միջազգային համաժողովին կայանալուն օրը: