Papa Françesku: të krishterët t’u çojnë dashuri e shpresë të varfërve për fe
Feja është baza e përvojës së të krishterit. Besimtari në Krishtin është i thirrur
t’ua dëshmojë atyre, të cilët nuk e morën këtë dhuratë e kanë nevojë për shpresë.
Është porosia e Papës në audiencën me 300 vullnetarët e Vitit të Fesë, që përfundoi
dje. Posaçërisht kur vuan, i krishteri jep provën e fesë, duke e lëshuar veten plotësisht
në krahët e Zotit, theksoi në mënyrë të veçantë Ati i Shenjtë.
Në epokën kur
fjala varfëri të kujton skena krize e mjerimi, shpesh tepër tronditëse, Papa Françesku
nxori nga skutat atë, që mund ta quajmë varfëria e varfërive. Nuk është varfëri e
njerëzve, që u mungon buka, por e atyre, që u mungon gjëja kryesore: feja. Varfëri
për fe, e quajti Ati i Shenjtë. Para tij, nën afresket e Sallës Klementine, ishin
ulur vullnetarët, që bashkëpunuan me dikasterin e Ungjillëzimit të Ri në veprimtaritë
e shumta të Vitit të Fesë. “Shërbim i çmuar” e quajti Papa, e edhe fisnik që, ju vetë,
para të tjerëve, nënvizoi, ju mësoi ta hapni zemrën për takimin me të tjerët, posaçërisht
me ata, që nuk e njohin fenë, as shpresën: ”Kjo është e rëndësishme, madje,
do të thosha, themelore! Posaçërisht t’ua hapësh zemrën atyre, që nuk kanë fe e as
shpresë në jetë. Flasim shumë për varfërinë, por jo gjithnjë mendojmë se ka edhe të
varfër për fe. E janë shumë…. Shumë njerëz, që kanë nevojë për një gjest njerëzor,
një buzagaz, një fjalë të vërtetë, një dëshmi, përmes së cilës ta prekin me dorë afërsinë
e Jezu Krishtit. Uroj të mos i mungojë askujt ky gjest dashurie e përdëllimi, që lind
nga feja”. Së bashku, pati kujtuar më parë Papa Françesku, duhet ta lavdërojmë
me të vërtetë Zotin për thellësinë shpirtërore e zellin apostolik, që nxitën nismat
e shumta baritore të këtyre muajve, në Romë e në të katër anët e botës. Ne, vijoi,
mund të dëshmojmë se feja e Krishtit është e aftë të na i ngrohë zemrat, duke na bërë
vërtet forcë shtytëse për ungjillëzimin e ri. E sot, më shumë se kurrë, ndjehet nevoja
për bashkësi të krishtera, të impenjuara në një apostullim të guximshëm, që shkojnë
t’i kërkojnë njerëzit në mjediset e tyre, edhe në ato më të vështirat, duke u dëshmuar
fenë në Krishtin: “Feja është vena e pashterrshme e gjithë veprimtarisë sonë,
në familje, në punë, në famulli, me miqtë, në mjedise të ndryshme shoqërore. E kjo
fe e fortë, e vërtetë, shihet posaçërisht në çaste vështirësish e provash: atëherë
i krishteri e lëshon veten plotësisht në krahët e Zotit, në gjirin e Tij, i sigurtë
se ia besoi vetveten një dashurie të fortë si shkëmbi i pashkatërrueshëm. Pikërisht
në çaste vuajtjesh, nëse e lëshojmë krejt vetveten përvujtërisht në dorën e Zotit,
mund të japim dëshminë më të mirë”.