Papa benediktineve: Maria, ikona më shprehëse e shpresës së krishterë
Në një ditë të ngarkuar me veprimtari, Papa Françesku vizitoi sot Kuvendin e Shën
Andout Abat në Aventin të Romës, ku u takua dhe u lut me murgeshat benediktine kamaldoleze,
në Ditën pro Orantibus, pra në ditën që Kisha ua kushton të gjithë rregulltarëve të
klauzurës e atyre, që luten për mbarë botën. Kujtojmë se kjo Ditë u themelua nga Papa
Piu XII, më 21 nëntor 1953, në festën liturgjike të Paraqitjes së Zojës në Tempull.
Që atëherë, çdo 21 nëntor, besimtarët e krishterë ftohen ta falenderojnë Zotin për
dhuratën e jetës kundruese e në veçanti, për të gjithë ata, që në kuvendet e manastiret
e botës, i lartojnë Zotit lutjen për ardhjen e Mbretërisë së Tij. Papa Françesku,
i shoqëruar nga imzot Rino Fizikela, kryetar i Këshillit Papnor për Ungjillëzimin
e Ri, imzot George Genshvain, prefekt i Shtëpisë Papnore dhe imzot Guido Marini, mjeshtër
i Kremtimeve Liturgjike Papnore, u prit nga Abatesha e kuvendit, motër Mikela Porçelato
dhe nga 21 murgeshat e bashkësisë. Ati i Shenjtë këndoi Lutjen e Mbrëmësores bashkë
me motrat, sipas rregullës kamaldoleze, mori pjesë në Adhurimin Eukaristik dhe mbajti
një meditim, kushtuar kundrimit të Zojës së Bekuar, që e njohu dhe e deshi Jezusin,
si asnjë krijesë tjetër, duke bërë vullnetin e Atit. “Kush bën vullnetin e Atit tim,
që është në qiell, është për mua vëlla, motër e nënë” (Mt 12,50), kujtoi Papa,
duke cituar Ungjillin e Shën Mateut. Me këto fjalë Jezusi na la një mesazh shumë të
rëndësishëm; vullneti i Zotit është ligji më i lartë, që e lidh njeriun me Të. E Maria
është nëna e shpresës, ikona më shprehëse e shpresës së krishterë, shtoi Papa, duke
kundruar, në vijim etapat kryesore të jetës së Zojës së Bekuar: çastin e Lajmërimit
të Zotit, Shpellën e Betlehemit, ku Ai lindi në varfëri, Paraqitjen në Tempullin e
Jeruzalemit, premtimin se një shpatë do t’ia shporonte tej për tej zemrën, profecinë
e shenjës së kundërshtimit, humbjen e rigjetjen e Jezusit në Tempull e përgjigjen
e Tij, që i kujton Nënës se po merrej me punët e Atit të vet qiellor. Përballë
gjithë këtyre vështirësive e të papriturave, vijoi të meditonte Papa, shpresa e Virgjërës
Nënë nuk lëkundet kurrë. Grua e shpresës, na mëson se shpresa ushqehet
nga dëgjimi, kundrimi, durimi, pritja që të përmbushen kohët e Zotit. Me fillimin
e jetës publike, vijoi Papa, Jezusi u bë Mjeshtër e Mesi; e Nëna e shikon misionin
e Birit me ngazëllim, duke e kuptuar, nësa Jezusi bëhet ajo shenjë kundërshtie, që
e pati profetizuar Simeoni plak. Papa vijoi kundrimin duke e kujtuar Zojën tek këmbët
e Kryqit, grua e dhimbjeve, e njëkohësiht, e pritjes së misterit të madh, që po kryhej,
më i madh se çdo dhimbje: “Edhe Ajo, në këtë çast, do të mund të thoshte, nëse
do të kujtonte premtimet e Lajmërimit: 'Kjo nuk është e vërtetë! U gënjeva!'. Po nuk
e bëri këtë”. Prandaj është e Lume, sepse besoi e nga besimi i saj, pa të mungullojë
ardhmëria e re! E priti me shpresë të nesërmen e Zotit: “Shpesh herë mendoj:
‘Po ne, a dimë ta presim të nesërmen e Zotit, apo duam të sotmen, të sotmen, të sotmen?
E nesërmja e Zotit është për Të, agimi i asaj dite, e para e javës. Na bën mirë ta
mendojmë, në kundrim, përqafimin e Birit me Nënën”. E vetmja llambë e ndezur
mbi varrin e Jezusit, është shpresa e Nënës, që në këtë çast, bëhet shpresë për mbarë
njerëzimin. E pyes veten, e edhe ju: “A është gjithnjë e ndezur kjo llambë
në manastiret? A pritet, në manastire, e nesërmja e Zotit?”. Papa e përfundoi
meditimin duke kujtuar se nga kundrimi i Marisë, buron shpresa, që na ndihmon në çastet
e errëta, kur besojmë se për ne nuk ka më shpresë. Maria është shpresa jonë, tha Papa,
dhe e mbylli meditimin duke iu lutur Zojës së Bekuar të na ndihmojë të gjithëve për
ta bërë jetën dhanti të pëlqyeshme për Atin qiellor e dhuratë gazmore për vëllezërit,
me sytë e ngulur gjithnjë drejt së nesërmes! Në përfundim, Papa u takua privatisht
me bashkësinë e murgeshave, e cila po sot, kremtoi hyrjen në kuvend të një motre shembullore,
Nazarena Krotës, e cila qëndroi për 45 vjet e mbyllur në qelinë e vet, në lutje të
vazhdueshme, duke u ushqyer me bukë e ujë e duke fjetur mbi një arkë të thjeshtë,
mbi kryqin e Krishtit. Murgeshat i dhanë Atit të Shenjtë letrat, që motër Nazarena
i shkruante Atit të vet shpirtëror, mbushur me dëshmi për fenë e saj të fuqishme e
për jetën e kaluar në shërbim të Kishës.