Апостальская Сталіца звярнула ўвагу на праблемы рыбакоў

Святы Пасад перасцярог рыблоўны сектар ад імкнення да прыбытку любым коштам. Такая логіка вядзе да знішчэння сусветных рыбных запасаў, негатыўнага ўплыву на экалогію і павелічэння часу працы рыбакоў, што з’яўляецца прычынай траўм, а часам нават смяротных зыходаў, гаворыцца ў спецыяльным пасланні на Сусветны дзень рыбалоўства, які адзначаецца 21 лістапада, Папскай рады пастырства эмігрантаў і падарожнікаў. У ім паддаецца крытыцы сістэма працоўных дагавораў, неспрыяльных для рыбакоў, недастатковая зарплата, мінімальныя патрабаванні да бяспекі іх працы.

Сямейныя адносіны тых, хто займаецца рыбнай лоўляй таксама сутыкаюцца з праблемамі. Рыбакі, вымушаныя на працяглы перыяд выходзіць у мора, праводзяць вельмі мала часу са сваімі сям’ямі, што прыводзіць да сур’ёзных наступстваў для росту і выхавання іх дзяцей.

Глабалізацыя і недахоп працоўнай сілы прывялі да новай і трывожнай з’явы – эксплуатацыі мігрантаў, якія з-за беднасці лёгка становяцца ахвярамі прымусовай працы або гандлю людзьмі.

Папская рада пастырства эмігрантаў і падарожнікаў заклікала капеланаў апостальства мора прыкласці ўсе намаганні да служэння і абароны рыбакоў і іх сем’яў.