Кардынал Кокапальмерыё ў Беларусі: краіна – прыклад экуменічнага дыялогу
Беларусь – гэта краіна,
дзе хрысціянскія канфесіі мірна жывуць і супрацоўнічаюць, заявіў кардынал Кокапальмерыё
ў інтэрв’ю Беларускай рэдакцыі Ватыканскага радыё. Іерарх прымае ўдзел у Міжнароднай
міжканфесійнай канферэнцыі “Хрысціянская антрапалогія перад выклікам сучаснасці”,
якая праходзіць у Мінску з 17 па 19 лістапада. Старшыня Папскай рады па інтэрпрэтацыі
заканадаўчых тэкстаў лічыць, што Беларусь можа стаць прыкладам экуменічнага дылогу
для іншых. “Я першы раз у Мінску, але я шмат чуў пра Беларусь і асабліва пра магчымасць
розных канфесій мірна суіснаваць тут. Гэта прыклад. Я спадзяюся і буду маліцца аб
тым, каб дзве канфесіі і далей жылі ў любові”, - сказаў прадстаўнік Святога Пасаду.
Ватыканскі іерарх 18 лістапада ўвечары прысутнічаў на канцэрце ў Белдзяржфілармоніі,
які быў прысвечаны памяці ахвяр Першай сусветнай вайны. Культурная акцыя стала яшчэ
адным крокам хрысціянскіх канфесій насустрач адзін аднаму – у канцерце прагучалі творы
Рахманінава і Моцарта (праваслаўнага і каталіцкага кампазітараў), а таксама выступіў
зводны хор, які складаўся з хораў праваслаўнай і каталіцкай парафій. Беларусь становіцца
пляцоўкай для прэстыжнага форуму ўжо 8 раз і не выпадкова.
Шырокае прадстаўніцства
Праваслаўнай Царквы і Каталіцкага Касцёла, а таксама пратэстанцкіх, мусульманскіх,
юдэйскіх лідэраў на пленарных пасяджэннях і круглых сталах – кажуць самі за сябе.
Секулярызацыя, прыхільнасць толькі матэрыяльным каштоўнасцям, гендэрныя пытанні, праблемы
біяэтыкі, свецкі радыкалізм у выхаванні сям’і – перад рознымі канфесіямі і рэлігіямі
сёння стаяць аднолькавыя пытанні, якія можна і трэба вырашаць разам. Зверыць кірунак,
пацвердзіць свае намаганіі і накіраваць імпульс грамадству – задача ўдзельнікаў форуму,
аналагаў якога амаль што няма. І галоўнае – гэта рэха такіх сустрэч, якія заўсёды
выклікаюць вялікі рэзананс у тэалагічных і навуковых колах, падкрэсліў першы віцэ-старшыня
Міжнароднага грамадскага аб’яднання “Хрысціянскі адукацыйны цэнтр св. Мятода і св.
Кірыла” Грыгорый Даўгяла.
“Мы бачым цікавасць і рэлігійных, і акадэмічных
колаў у Расіі, Украіне, а таксама ў дальнім замежжы. Гэта нас мабілізуе думаць аб
чарговым мерапрыемстве. Не хаваю, ёсць ідэя на 2015 год – чакаецца вельмі цікавая
дата, звязаная з узаемаадносінамі Царквы і грамадства, Царквы і дзяржавы ў сферы адукацыі.
Набліжаецца магутны юбілей – Еўрапейскіх універсітэтаў. Не выключана, што наступная
тэма будзе прысвечана хрысціянскай спадчыне, як дару еўрапейскай цывілізацыі ў галіне
адукацыі”, - падзяліўся арганізатар форумаў.
Сёння апошні дзень VIII Міжнароднай
міжканфесійнай канферэнцыі, арганізатары якой спадзяюцца, што традыцыя такіх форумаў
будзе працягнута – бо актуальнасць міжканфесійнага дыялога ў сучасным свеце толькі
ўзрастае.