Papa: Zoti na mësoftë të respektojmë gjyshërit. Në kujtesën e tyre është e ardhmja
e një populli
Një popull, që nuk respekton gjyshërit, është pa kujtesë, prandaj, pa të ardhme. Këto
qenë fjalët e Papës Françesku në homelinë e meshës së mëngjesit, në Shtëpinë e Shën
Martës. Ati i Shenjtë komentoi faqen biblike, që flet për Eleazarin e moshuar, i cili
zgjodhi vdekjen me martirizim, në vend që të pranonte ndihmën e miqve për të ikur.
Nuk deshi ta tradhtonte Zotin e deshi t’u dëshmonte të rinjve se nuk mund të jetohet
në hipokrizi. Para dy rrugëve, njëra – mohimi i Hyjit e, tjetra – martirizimi, Eleazari
zgjodhi të dytën, duke i qëndruar besnik fesë së vet e duke refuzuar mëshirën e rreme
të miqve, që e shtynin drejt gënjeshtrës: “Koherenca e këtij njeriu, koherenca
e fesë së tij, por edhe përgjegjësia për të lënë një trashëgimi të fisme, një trashëgimi
të vërtetë. Ne jetojmë një një kohë kur të moshuarit nuk vlerësohen aspak. Është fjalë
e shëmtuar, por shpesh ata hidhen në pleh. Sepse bezdisin. Të moshuarit janë ata,
që mbartin mbi supe historinë, doktrinën, fenë e na e lënë trashëgim. Janë ata që,
si vera e vjetër, kanë brenda forcën për të na lënë një trashëgimi të fisme”. E
këtu, Papa Françesku kujtoi një histori nga fëmijëria e tij. Protagoniste është familja
– një nënë, një baba e shumë fëmijë – por edhe gjyshi, i cili ndotej gjithnjë me supë,
kur hanin bashkë në tryezë. I bezdisur nga kjo, babai i familjes i blen një tryezë
të veçantë, ku e izolon prindin e vet. Një ditë, kthehet në shtëpi dhe sheh të birin,
që luante me një copë dru. “Çfarë po bën?” – e pyeti. “Një tryezë” – iu përgjigj djali.
“Pse?”. “Për ty baba, kur të bëhesh plak si gjyshi”: “Kjo histori më ka bërë
shumë mirë, gjithë jetën. Gjyshërit janë thesar i vërtetë. Letra drejtuar Hebrejve,
në kapitullin XIII, thotë: ‘Mos i harroni eprorët tuaj, të cilët e shpallën Fjalën
e Hyjit: vëreni mbarimin e jetës së tyre e ndiqni fenë e tyre’. Kujtimi i paraardhësve
sjell imitimin e fesë së tyre. Është e vërtetë se pleqëria është e keqe nganjëherë…
Për sëmundjet e gjithçka tjetër, por urtia e gjyshërve është trashëgimia jonë. Një
popull, që nuk kujdeset për gjyshërit, një popull që nuk i respekton, nuk ka të ardhme,
sepse nuk ka kujtesë, e ka humbur atë”. Duhet të mendojmë, vazhdoi Papa Françesku,
për sa e sa të moshuar, që janë në azilet e pleqve e sa e sa të tjerë, të braktisur
nga të vetët. Por ata janë thesari i shoqërisë, nguli këmbë Ati i Shenjtë: “Të
lutemi për gjyshërit, për gjyshet, që shpesh kanë pasur një rol heroik në transmetimin
e fesë, në kohë persekutimi. Kur babai e nëna nuk ishin në shtëpi, kur kishin ide
pak si të çuditshme, që u mësonte politika e kohës, qenë gjyshet ato, që e transmetuan
fenë. Urdhërimi i katërt(‘ndero prindërit, nëse do të jetosh shumë mbi dhe’, sh.r):
i vetmi, që premton diçka si këmbim. Është urdhërimi i mëshirës. Të jemi të mëshirshëm
me paraardhësit. T’u lutemi sot shenjtorëve të moshuar – Simeonit, Anës, Polikarpit
dhe Eleazarit – e shumë të tjerëve: t’u kërkojmë hirin për t’u kujdesur, për t’i dëgjuar
e për t’i nderuar paraardhësit tanë, gjyshërit”.