8,5 млн. католікаў з усяго свету наведалі Рым з нагоды Года веры
За апошнія 13 месяцаў
больш чым 8,5 млн. католікаў з усяго свету здзейснілі пілігрымку ў Рым з нагоды Года
веры, паведаміў 18 лістапада 2013 г. у Ватыкане арцыбіскуп Рына Фізікела, старшыня
Папскай рады па новай евангелізацыі. Адмысловы Год, накіраваны на паглыбленне і пераказ
веры, распачаў у Касцёле 11 кастрычніка 2012 г. Бэнэдыкт XVI, а завершыць 24 лістапада
2013 г. – ва ўрачыстасць Хрыста Валадара Сусвету – папа Францішак.
Тэматыка
Года веры павінна была паспрыяць росту веры, хрысціянскага і касцёльнага жыцця, асаблівым
чынам ў некалі каталіцкіх, а зараз секулярызаваных, краінах Заходняй Еўропы. Год веры
быў задуманы, як магчымасць для сапраўднага і новага навяртання да Хрыста і місіянерскай
актыўнасці для новай евангелізацыі.
Арцыбіскуп Фізікела звярнуў увагу, што
іншым важным фактарам была дата, абраная Бэнэдыктам XVI для распачацця Года веры.
11 кастрычніка 2012 г. адзначалася 50-годдзе адкрыцця ІІ Ватыканскага Сабору і 20-годдзе
публікацыі Катэхізіса Каталіцкага Касцёла.
Падагульняючы гэты адмысловы час,
старшыня Папскай рады нагадаў, што ў рамках Года веры ў Ватыкан былі запрошаны шматлікія
групы: семінарысты, моладзь, касцёльныя рухі і аб’яднанні, сем’і. Прайшлі літургіі,
пілігрымкі, канферэнцыі, канцэрты і выставы.
Пасля Года св. Паўла і Года святарства,
Год веры быў трэцяй ініцыятывай пантыфікату Бэнэдыкта XVI. Упершыню Года веры быў
праведзены па ініцыятыве Паўла VI у 1967 г. і быў прымеркаваны да адзначэння 1900-годдзя
мучаніцкай смерці святых апосталаў Пятра і Паўла.