Беларусь: Цэрквы разам шукаюць адказы на выклікі сучаснасці
17 лістапада ў Мінску
адкрылася Міжнародная міжканфесійная канферэнцыя “Хрысціянская антрапалогія перад
выклікам сучаснасці”. Форум, ужо 8-ы па ліку ў серыі міжканфесійных сустрэч, арганізаваны
Хрысціянскім адукацыйным цэнтрам імя св. Мятода і св. Кірыла і Інстытутам межрэлігійнага
дыялога і міжканфесійнай камунікацыі пры падтрымцы Папскай рады спрыяння хрысціянскаму
адзінству. Дзесяткі тэолагаў з ЗША, Бельгіі, Францыі, Германіі, Турцыі, Літвы, Латвіі,
Украіны, Расіі сабраліся ў беларускай сталіцы, каб вызначыць кола пытанняў, на якія
прадстаўнікі розных канфесій і рэлігій (сярод удзельнікаў таксама мусульмане і яўрэі)
павінны даць адказ разам.
У сучасным свеце падпадаюць пад рэвізію традыцыйныя
каштоўнасці, ідзе іх падмена на дыскусію пра правы чалавека рэалізацыю сваіх магчымасцяў.
Калі спробы перагледзець хрысціянскія каштоўнасці ўсё ж дасягнуць поспеху, лічыць
арцыбіскуп Бакінскі і Азербайджанскі Аляксандр, чалавецтва асуджана на тупіковы шлях
развіцця. “Гэта выклік для ўсіх рэлігій: для хрысціян, для мусульман, для будыстаў,
для юдэяў. Свяцейшы Патрыярх Кірыл на пытанне, што можна зрабіць у гэтай сітуацыі,
адказаў і заклікаў, каб рэлігіі пераходзілі ад талерантнасці да канструктыўнага межрэлігійнага
дыялога і супрацоўніцтва. Традыцыйныя рэлігіі разам могуць вырашаць праблемы выхавання
моладзі, барацьбы з наркаманіяй, умацавання сямейных каштоўнасцяў і барацьбы за мір
супраць узбраення. Усё гэта сумесная справа”, - адзначыў іерарх.
Прывітальныя
словы да ўдзельнікаў канферэнцыі скіравалі кіраўнікі Праваслаўнай Царквы і Каталіцкага
Касцёла краіны – Мітрапаліт Філарэт, Партрыаршы экзарх усея Беларусі, арцыбіскуп Тадэвуш
Кандресевіч, Мітрапаліт Мінска-Магілёўскі, а таксама вядомы мусульманскі багаслоў
– кіраўнік мусульман Каўказа шэйх-уль-іслам Алахшукюр Паша-задэ. Арцыбіскуп Клаўдыё
Гуджэроці, Апостальскі нунцый у Беларусі перадаў прывітанне ўдзельнікам ад Святога
Айца Францішка, падкрэсліўшы, што гэты форум дапамагае не толькі разумець адзін аднаго,
але і ўзрастаць ў імкненні да аднаўлення адзінства, якое прадстаўнікі розных канфесій
спрабуюць рэалізаваць у паўсядзённым жыцці. “Дыялогу ніколі няма альтэрнатывы ні ў
жыцці грамадскім, ні ў жыцці рэлігійным, там, дзе цэнтрам з’яўляецца любоў. Той, хто
не вядзе дыялогу ў сферы палітыкі – робіць памылку, той, хто не вядзе дыялогу ў рэлігіі
– чыніць грэх”, - сказаў ватыканскі дыпламат.
Падчас першага дня форума былі
прадстаўлены практычныя вынікі міжканфесійнай працы – праваслаўна-каталіцкі слоўнік
“Багаслоўская антрапалогія”. 8 гадоў паралельна, незалежна і з двух пунктаў гледжання
– заходняга і ўсходняга – над яго артыкуламі працавалі праваслаўныя і каталіцкія рэдактары.
Гэта першы ў сваім родзе слоўнік параўнальнай антрапалогіі, першая сумесная праца
па гэтай тэме паміж Цэрквамі не фармальнага, а змястоўнага характару, адзначыў пратаіерэй
Андрэй Лоргус, рэктар Інстытута хрысціянскай псіхалогіі з Масквы, рэдактар слоўніка.
“Гэта першы аналіз, калі па антрапалогіі мы параўноўваем крок за крокам, пытанне за
пытаннем, артыкул за артыкулам вучэнне Рыма-каталіцкага Касцёла і Рускай Праваслаўнай
Царквы. Перад тым, як параўноўваць, мы павінны ведаць меркаванні адзін аднако, а потым
размаўляць і нават спрачацца. Мы пабудавалі падмурак, а цяпер можна будаваць дом”,
- лічыць навуковец.
Сёння ўвечары да канферэнцыі далучыцца яшчэ адзін высокі
госць – кардынал Франчэска Кокапальмерыё, старшыня Папскай рады па інтэрпрэтацыі заканадаўчых
тэкстаў, прадстаўнік Святога Пасаду.