Վատիկանի Պետքարտուղարը կը հասնի Վատիկան։

Նորանշանակ Վատիկանի Պետքարտուղար` գերապայծառ Բիէդրօ Բարոլինը շաբաթ 16 նոյեմբերին ժամանեց Վատիկան ու որպէս ժամանակաւոր նստավայր ընտրեց` Սանդա Մարդայի տունը։ Երկուշաբթի 18 նոյեմբերին Ան պիտի սկսի իր պաշտօնական գործունէութիւնը - յայտարարած է Վատիկանի մամլոյ գրասենեակի բանբեր` Հայր Ֆետերիքօ Լոմպարտին։
Յայտնենք որ անցեալ 15 հոկտեմբերին Վատիկանի մէջ տեղի ունեցած էր նոր Պետական Քարտուղարի պաշտօնական ներկայացումը սակայն, բժշկական պատճառներու բերումով, գերապայծառ Բարոլինը միմիայն այժմ կարողացաւ ժամանել Վատիկան ստանձնելու համար իր նոր պաշտօնը։ Գերապայծառ Բարոլինը, Ֆրանչիսկոս Սրբազան Քահանայապետի կողմէ Վատիկանի Պետական Քարտուղար` նշանակուած էր անցեալ 31 օգոստոսին յաջորդելով Կարտինալ Թարչիզիօ Պերթոնէին, մինչեւ այդ թուականը Ան եղած է Վէնէզուելլայի մօտ Պապական Նուիրակ։