Jemi në kapitullin e tretë të enciklikës Drita e fesë, që mban titullin: Çfarë mora,
po jua përçoj juve. Në kapitullin e mëparshëm vumë re se feja është e lidhur me dëgjesën
dhe më pamjen. Me anë të fesë, njeriu i hapet Hyjit dhe merr prej tij fjalën e dritën.
Feja, sikurse na hap ndaj Hyjit, na hap edhe ndaj njerëzve. Dhurata e fesë e shndërron
njeriun në dhurues, prandaj besimtari është vetvetiu dëshmitar, apostull, sikurse
lexohet në enciklikë: "Kush është hapur ndaj dashurisë së Hyjit, ka dëgjuar fjalën
e tij dhe ka marrë dritën e tij, nuk mund ta mbajë për vete këtë dhuratë" (n. 37).
Shën Pali e vëren këtë veti të fesë brenda traditës hebraike, kur citon shkrimin,
që thotë: " Besova, prandaj edhe fola" (2Kor 4,13). Njeriu i prekur nga feja, thotë
enciklika, përthyen dritën me të cilën Hyji e ka ndriçuar: "Drita e Jezusit vezullon,
si në pasqyrë, në fytyrën e të krishterëve, e kështu përhapet, mbërrin deri tek ne,
në mënyrë që edhe ne të mund të marrim pjesë në këtë pamje e t'ua përthyejmë të tjerëve
dritën e tij, si drita e qiriut që, në liturgjinë e Pashkëve, ndez shumë qirinj të
tjerë" (n.37). Feja përhapet njësoj në kohë, si horizontalisht, ashtu edhe vertikalisht.
Siç përthyhet drita e Krishtit në fytyrat e shumë besimtarëve të së njëjtës kohë dhe
përhapet mes njerëzve, duke ndriçuar gjithë bashkëkohësinë, po ashtu përthyhet edhe
nga brezi në brez dhe përshkon e ndriçon shekujt: “Fytyra e Krishtit mbërrin gjer
tek ne përmes zinxhirit të pashkëputur të dëshmive. Si është e mundur kjo? Si mund
të jemi të sigurt se takojmë ‘fytyrën e vërtetë’ të Jezusit nëpër shekuj?” (n. 38).
Për t’iu përgjigjur kësaj pyetjeje, duhet të marrim në shqyrtim natyrën njerëzore.
Duhet të përpiqemi të kuptojmë cila është vetia e patjetërsueshme e njeriut. Sipas
antropologjisë biblike, njeriu është marrëdhënie qysh në zanafillën e vet: “Rrjedh
nga të tjerët, u përket të tjerëve dhe jeta e tij bëhet më e madhe në takimin me të
tjerët” (n. 39). Nëse marrëdhënia është thelbi i natyrës njerëzore, kjo do të thotë
se procesi i nxënies nuk mund të jetë i plotë dhe i vërtetë, kur njeriu mbyllet në
vetvete dhe e kërkon të vërtetën sipas kritereve individuale: “Nëse njeriu do të ishte
individ i izoluar, nëse do të niseshim vetëm nga ‘uni’ individual, që e kërkon tek
vetja sigurinë e njohjes, kjo siguri do të ishte e pamundur. Nuk mund ta shoh vetë
atë që ka ndodhur në një epokë shumë të largët nga e imja” (n. 38). Kërkimi i sinqertë
i së vërtetës e vendos njeriun në marrëdhënie me të tjerët, për të mësuar prejt të
tjerëve atë që nuk ka mundur ta përjetojë vetë. I drejtohemi së shkuarës, për të mësuar
nga të tjerët çfarë nuk mund të dimë vetë, dhe i drejtohemi të ardhmes, për t’u mësuar
të tjerëve çfarë ata nuk mund të mësojnë pa dëshminë tonë. Kjo lidhje në kohë përbën
kujtesën kishtare: “E shkuara e fesë, ajo vepër dashurie e Jezusit, që i ka dhënë
botës një jetë të re, vjen tek ne me anë të kujtesës së të tjerëve, të dëshmitarëve,
që ruhet e gjallë në subjektin e vetëm të kujtesës, që është Kisha” (n. 38). Në Kishë
është themelor roli i Shpirtit të Shenjtë, i cili na kujton gjithçka që duhet të dimë
rreth Jezusit dhe i mban të bashkuara të gjitha kohët e të krishterëve, duke realizuar,
kështu, bashkëkohësinë me Jezusin. Kërkimi i sinqertë i së vërtetës, pra, e zhvendos
njeriun nga vetmia dhe e vendos brenda një rrjeti të tërë marrëdhëniesh: “Është e
pamundur të besosh i vetëm. Feja nuk është një mundësi individuale, që ndodh në shpirtin
e besimtarit, nuk është marrëdhënie e izoluar e ‘unit’ të besimtarit me ‘Ti-në’ hyjnore,
e subjektit të pavarur me Hyjin. Ajo i hapet natyrshëm ‘ne-së’, zhvillohet gjithmonë
brenda bashkësisë së Kishës” (n. 39). Feja është përgjigje ndaj një fjale që nuk
buron prej vetes, prandaj nënkupton dëgjesën dhe e vendos njeriun në dialog e në bashkësi
me të tjerët. Për këtë arsye liturgjia e pagëzimit është formuluar si pyetje dhe përgjigje.
Përgjigja është njëkohësisht individuale dhe e përbashkët: “Është e mundur të përgjigjemi
në vetën e parë, ‘besoj’, vetëm sepse i përkasim një bashkësie më të madhe, vetëm
sepse thuhet edhe ‘besojmë’. Bashkësia kishtare është pasqyrë e bashkësisë trinitare.
Në të nuk jemi kurrë të vetëm, jo vetëm sepse ndajmë fenë dhe jetën me anëtarët e
tjerë të kishës, por edhe jemi të shtyrë drejt njerëzve përjashta Kishës, për t’u
përçuar gëzimin që buron nga takimi me Krishtin.