Հինգշաբթի 14 նոյեմբերին Ֆրանչիսկոս Քահանայապետը կ՛այցելէ Իտալիոյ Նախագահական Պալատը։
Ֆրանչիսկոս Սրբազան Քահանայապետը, 14 նոյեմբերին, պաշտօնական այցելութիւն կը կատարէ Իտալիոյ
Հանրապետութեան Նախագահ` Տիար Ճորճօ Նափոլիթանոյի, հանդիսանալով պատմութեան 6-րդ Քահանայապետը
որ Իտալիոյ ''Գուիրինալէ'' կոչուած` նախագահական պալատը կ՛այցելէ։ Պիոս ԺԲ երջանկայիշատակ
քահանայապետը եղած է առաջինը որ այցելած է ''Գուիրինալէ''-ի պալատը, 28 դեկտեմբեր 1939-ին,
հանդիպում ունենալով այդ շրջանի Իտալիոյ Թագաւոր Վիթթորիօ Էմանուելէ Գ-ին հետ։ Յովհաննէս
ԻԳ քահանայապետը, Իտալիոյ հանրապետութեան ծնունդէն ետք, եւ քահանայապետի մը ''Գուրինալէ''
կատարած այցելութենէն 24 տարիներ ետք, եղած է առաջին քահանայապետը որ այցելած է նախագահական
պալատը` 11 մայիս 1963-ին։ Պօղոս Զ Գուրինալէն այցելեց 3 անգամ 1963-ին, 1964-ին
եւ 1966-ին, ապա Յովհաննէս Պօղոս Բ, 18 տարիներ ետք իտալիոյ Նախագահական Պալատը այցելեց
2 յունիս 1984-ին, հանդիպելով Իտալիոյ հանրապետութեան այդ շրջանի նախագահ Սանտրօ Բերդինիի
հետ։ Ան ապա 1986-ին հանդիպեցաւ Գոսսիկա նախագահին եւ 1998-ին Սքալֆարոյին։ 24 յունիս
2005-ին Պենետիկտոս ԺԶ-ը այցելեց Գարլօ Ազէլիօ Չամբի նախագահը ու ապա 2008-ին Նափոլիթանոյ
նախագահին օրով այցելութիւն տուաւ Գուրինալէի նախագահական պալատ։ Յայտնենք որ 14
նոյեմբեր 2013-ի հանդիպումը կը հանդիսանայ երրորդը ընդմէջ Ֆրանչիսկոս Պապին եւ Նախագահ
Նափոլիթանոյին։ Առաջինը տեղի ունեցած էր 19 մարտին, Ֆրանչիսկոս Քահանայապետի գահակալութեան
օրը, ապա երկրորդը 8 յունիսին` Իտալիոյ Նախագահի Վատիկան կատարած պաշտօնական այցելութեան
առթիւ, որուն ընթացքին Նափոլիթանոն պաշտօնական հրաւէր ուղղեց Ֆրանչիսկոս Պապին` այցելելու
''Գուիրինալէի'' պալատը։