Патрыярх Кірыл заклікаў Каталіцкі Касцёл сумесна адстойваць хрысціянскія каштоўнасці
Патрыярх Маскоўскі
і ўсяе Русі Кірыл пацвердзіў зацікаўленасць у супрацоўніцтве з Каталіцкім Касцёлам
у справе абароны хрысціян і іх каштоўнасцяў у свеце. На сустрэчы з арцыбіскупам Міланскім,
кардыналам Анджэла Скола ў Маскве 12 лістапада 2013 г. ён выказаў заклапочанасць тым,
“што адбываецца ў духоўным жыцці Еўропы і не толькі Еўропы”. Іерарх нагадаў, што сёння
хрысціяне фізічна пакутуюць на Блізкім Усходзе, у Афрыцы, Азіі, а ў шэрагу краін на
іх адбываецца схаваны ціск пад лозунгамі талерантнасці і мультыкультуралізму. Пры
гэтым людзі няверуючыя адкрыта рэалізуюць свой погляд на свет, запаўняючы практычна
ўсю інфармацыйную прастору сваёй філасофіяй жыцця. На думку Патрыярха, больш за 90%
сучаснага інфармацыйнага патоку нясе ў сабе “вобраз бязбожнай цывілізацыі”. Прадстаяцель
перакананы, што “ніколі ў двух Цэркваў не было столькі важных прычын да таго, каб
працаваць разам, як сёння”.
Кардынал Скола з жалем заўважыў, што “на Захадзе
занадта мала гаворыцца пра гэта”.