Հայաստանը արժանացաւ «National Geographic Traveler»-ի «Տարուան յայտնութիւն» մրցանակին
Ամփոփուեցան «National Geographic Traveler» ամսագրի ռուսական տարբերակին կողմէ կազմակերպուած
լաւագոյն զբօսաշրջային ուղղութեան մրցոյթի առցանց քուէարկութեան արդիւնքները: «Արմէնփրես»-ը
կը հաղորդէ՝ վկայակոչելով Հայաստանի ազգային մրցունակութեան հիմնադրամի հանրային կապերու
գրասենեակը, որ մրցոյթի արդիւնքով Հայաստանը յաղթած է «Տարուան յայտնութիւն» անուանակարգին
մէջ: Այս տիտղոսը ապացոյցն է Հայաստանի բազմաբնոյթ զբօսաշրջութեան խթանման ուղղութեամբ
Հայաստանի ազգային մրցունակութեան հիմնադրամի կողմից իրականացուող բազմաթիւ քայլերուն:
Այն յատկապէս կարեւոր է Հայաստանի պատմամշակութային եւ ազգային-հոգեւոր ժառանգութեան`
ռուսական շուկային մէջ ճանաչելիութեան բարձրացման եւ ներգնայ զբօսաշրջային հոսքերու խթանման
տեսանկիւնէն: Նախապէս՝ այս տարուան Ապրիլին, ՀԱՄՀ հրաւէրով ճանաչողական այցի ծիրէն
ներս Հայաստանի մէջ հիւրընկալուած էր «National Geographic Russia» ամսագրի խմբագրակազմը:
Այցի արդիւնքով «National Geographic Russia» եւ «National Geographic Traveler» ամսագիրներուն
մէջ հրապարակուած են Հայաստանին նուիրուած յօդուածներ, իսկ Nat-Geo.ru կայքին մէջ` լուսանկարներու
շարք: