Ֆրանչիսկոս Սրբազան Քահանայապետի 6 նոյեմբերի գործունէութիւնը։

Չորեքշաբթի 6 նոյեմբերի առաւօտեան ժամը 9,30-ին Ֆրանչիսկոս Սրբազան Քահանայապետը Տոմուս Սանդա Մարդայի մէջ հանդիպում ունեցաւ Քահանայապետական Գիտութեան Ակատեմիայի նախաձեռնութեամբ կազմակերպուած` «Հացն ու ուղեղը, կրթութիւն եւ աղքատութիւն» խորագրով գիտաժողովի մասնակիցներուն հետ։ Ան ապա ժամը 10,30-ին Սուրբ Պետրոսի հրապարակի վրայ համախմբուած տասնեակ հազարաւոր իտալացի եւ օտարազգի ուխտաւորներուն շնորհեց հրապարակային ունկնդրութիւն։ Ունկնդրութենէն առաջ Սրբազան Հայրը Վատիկանի ''զանգակներու կամարին'' տակ վառեց 2013-ի ''universiade'' կոչուած` համալսարանականներու ողիմպիական խաղերու ջահը։ Յայտնենք որ 2013-ի ''Ունիվէրսիատէն'' տեղի պիտի ունենայ Իտալիոյ Թրէնթօ քաղաքին մէջ, 11 - 21 դեկտեմբերին, եւ որուն իրենց մասնակցութիւնը պիտի բերեն աշխարհի 60 երկիրներէ զանազան համալսարաններու 3000 երիտասարդ մարզիկներ։
Հրապարակային ունկնդրութեան աւարտին, Ֆրանչիսկոս Սրբազան Պապը, Պօղոս Զ-ի անուան սրահին մէկ գրասենեակի մէջ ընդունեց` Վենեզուելլայի ''“Mesa de la Unidad Democràtica” կուսակցութեան ղեկաւար` Տիար Էնրիքէ Գաբրիլէս Րատոնսգին։