Kardinal Filoni: Kisha në Pakistan, aktive në një realitet të vështirë, ka nevojë
për solidaritet
Prefekti i Kongregatës për Ungjillëzimin e Popujve, kardinali Fernando Filoni, sapo
është kthyer nga një udhëtim në Pakistan, ku kryesoi meshën për shugurimin e ipeshkvit
të Faisalabadit, imzot Jozef Arshad. Gjatë vizitës së tij baritore, kardinali u takua
edhe me bashkësinë katolike lokale. Në mikrofonin tonë, shpjegon se ç’Kishë punon
e jeton në Pakistan, vend me shumicë myslimane: Kisha në Pakistan është pakicë,
në krahasim me popullsinë e madhe të këtij vendi, por është një pakicë mjaft e rëndësishme
dhe aktive. Gjeta një Kishë të impenjuar jashtëzakonisht në jetën fetare, por edhe
në shërbime të ndryshme shoqërore dhe edukative, në kontakt me realitetin e përditshëm
të vendit, sidomos me bashkësitë fetare islamike. Ka një bashkëpunim të frytshëm edhe
me Kishat jo katolike, pasi ndihmojnë njëra-tjetrën për zgjidhjen e problemeve të
bashkëjetesës ndërmjet krishterimit e islamizmit. Kisha jonë jeton me pak. Imazhi
i Shën Palit Apostull, ai i enës prej balte - i menduar në gjendje shumë të vështira,
në mesin e enëve prej hekuri - më duket mëse i përshtatshëm e shprehës. Në
vend ndjehet kërcënimi i ekstremizmit, i fanatizmit islamik. Është në rrezik krejt
bashkësia e krishterë e Pakistanit? Po, më duket se vendi e jeton këtë traumë.
Disa më thanë edhe se ky problem nuk i përket historisë dhe kulturës së një vendi
të ri, si Pakistani (kujtojmë se është themeluar në vitin 1947). Në të kaluarën, bashkëjetesa
krijonte disa vështirësi, por jo në këtë nivel. Sot, përjetohet një traumë e përgjithshme.
Natyrisht, të krishterët i vuajnë drejtpërdrejt, në lëkurën e tyre, sulmet, që janë
edhe psikologjike, prekin edhe mbijetesën, prandaj lënë shenja, nganjëherë të pashlyeshme.
Megjithatë, njerëzit nuk kanë ndërmend të largohen, duan të qëndrojnë në vend për
të dhënë dëshminë e tyre si të krishterë, vendosur aty nga Provania Hyjnore. Mendoj
se edhe autoritetet politike janë të vetëdijshme për këtë. Është një Kishë, që ka
nevojë për solidaritetin e të gjitha Kishave të botës. Duhet ta ndjejë dashurinë,
përkrahjen, lutjen, nuk duhet të ndjehet vetëm. Personalisht, pata rastin të takohem
me njerëz, që më falenderonin thjesht për faktin se kisha shkuar aty, se po rrija
me ta, se po lutesha me ta. Merrnin guxim nga prania e një përfaqësuesi të Vatikanit,
më shprehën shumë dashuri për Atin e Shenjtë, bekimin e të cilit ua çova. Pra, është
një Kishë, e cila jep një dëshmi shumë të bukur. Nga pikpamja shoqërore
dhe edukative, cili është roli i Kishës Katolike në Pakistan? Është një
rol i vlerësuar shumë, gjithmonë. Edhe sot, shkollat tona nuk janë vetëm për të krishterët.
Fëmijët, të rinjtë, të rejat e krishtera studiojnë përkrah shokëve e miqve myslimanë,
që përbëjnë shumicën nëpër shkolla. Familjet i dërgojnë që të jetojnë, të rrinë e
të edukohen së bashku, të mësojnë së bashku vlera e sjellje, të njihen, pavarësisht
nga feja e ndryshme. Pra, familjet dhe autoritetet i vlerësojnë shkollat tona. Ne
kemi rreth 560 shkolla e 130 institute bamirësie. Karitasi punon mirë dhe respektohet
shumë, sidomos pas tërmetit të fundit, pasi ndihmoi edhe aty, ku nuk kishte asnjë
familje të krishterë.