Звычайна пытанні веры атаясамліваюцца з духоўнай сферай чалавека. Але ці гэта правільна?
Ці можа і ці павінна вера ахопліваць не толькі духоўнае, але і цялеснае жыццё асобы?
На гэтыя пытанні сёння мы пастараемся пашукаць адказ.
Тое, што вера найбольш
атаясамліваецца з духоўнай сферай чалавечага жыцця, мае сваё абгрунтаванне. Бо справы
веры тычацца нашых адносінаў з Панам Богам. А Ён, як вядома, нематэрыяльны, неабмежаваны
законамі фізікі, разумны, дасканалы і ўсюды прысутны дух. Святое Пісанне распавядае
пра тое, што Бог стварыў чалавека на Сваё падабенства. Гэта значыць, што чалавечай
асобе таксама ўласціва нематэрыяльнасць, духоўнасць, разумнасць, здольнасць пераўзыходзіць
законы фізікі. Аднак у адрозненні ад Бога, мы абмежаваныя ў сваіх магчымасцях. Больш
таго, прырода чалавека складаецца не толькі з нематэрыяльнай душы, але і фізічнага
цела. Па сваіх фізічных дадзеных мы блізкія да свету біялагічных арганізмаў. А яны,
у параўнанні з духоўнымі істотамі, вельмі недасканалыя: абмежаваныя ў прасторы і фізічных
магчымасцях, іх лёгка пашкодзіць або забіць, яны маюць абмежаваныя органы і спосабы
кантакту з акружаючым асяроддзем.
Свядомасць гэтай дваістасці чалавечай прыроды
ва ўсе вякі нараджала шматлікія спрэчкі аб тым, хто такі чалавек: звычайная жывёла,
дух асуджаны на вязніцу цела ці можа нешта большае за дух і матэрыю?
У залежнасці
ад адказу на пытанне: “хто такі чалавек?”, напрацягу стагоддзяў паўставалі самыя неверагодныя
вучэнні, рэлігійныя і палітычныя сістэмы. Тыя, хто лічыў чалавека толькі жывёлай,
прыраўнівалі вартасць яго жыцця да лёсу расліны або жывёлы, якія па сляпых законах
прыроды нарадзіліся, каб расквітнець і бессэнсоўна загінуць, працягваючы замкнёны
ланцуг прыроды: нараджэння і памірання. Самыя розныя мысляры і рэлігійныя дзеячы прапаноўвалі
часам дыяметральна супрацьлеглыя выхады з замкнёнага кола ўяўленняў чалавека пра сваю
прыроду: ад самазнішчэння, падаўлення ў сабе цялеснасці або духоўнасці да эгаістычнага
выкарыстання сваёй жыццёвай энергіі для самазадавальнення або пераадолення заканамернасцяў
уласнай натуры.
Адкрыццё магчымасцяў, якія дае чалавеку духоўнасць, здольная
пераўзыходзіць законы фізікі і біялогіі, давала многім надзею на новы шлях самазбаўлення.
Па сённяшні дзень не перастаюць узнікаць разнастайныя вучэнні, якія заахвочваюць людзей
пагарджаць целам, адносіцца да яго інструментальна як да машыны, а думаць толькі пра
нематэрыяльнае: самасцвярджэнне, самарэалізацыю, магутнасць або аздараўленне праз
кантакт з акультнымі сіламі.
Пан Бог ад пачатку гісторыі выйшаў насустрач
чалавеку, каб распавесці яму пра яго годнасць і сэнс існавання. Нават далёкія ад Бога
людзі сёння могуць адкрыць Святое Пісанне, каб пазнаёміцца з гэтым вялікім Аб’яўленнем
Пана. Адказ Бога аказваецца адначасова геніяльна просты і складаны. Чалавек – гэта
асоба. Не дух, і не цела. Але непадзельнае адзінства духоўнага і матэрыяльнага пачаткаў.
Калі чалавек кажа: “я”, то гэта адносіцца ў роўнай ступені і да яго цела, і да душы.
І адзін, і другі элемент нашай прыроды – гэта неад’емная і аднолькава важная складовая
нашай асобы, якая патрабуе вялікага клопату і якая не можа не ўдзельнічаць у таямніцы
веры – кантакце чалавека з Богам.
Шматвяковы вопыт Касцёла, правераны жыццямі
незлічонай колькасці святых, паказвае, што адзіна правільны шлях да сапраўднай чалавечнасці
і да паўнаты адносінаў з Богам – гэта дасканалая гармонія паміж духоўным і цялесным
жыццём. Усе сферы чалавека яднаюцца і дасягаюць аптымальнай збалансаванасці тады,
калі ён дазваляе Богу вызначаць рытм свайго унутранага і знешняга жыцця. Адкрыццё
мудрага і мэтанакірванага творчага плану Пана Бога, а таксама рэальныя адносіны з
Ім немагчымыя без згоднага ўзаемадзеяння ўсіх сфераў чалавека. Пан Бог прагне размаўляць
не з целам або душой, але з цэлым чалавекам – з асобай. Пагэтаму вера – гэта справа
не толькі чагосьці ўнутранага або знешняга. Пан Бог чакае ад нас “і.., і…”. Гэта значыць,
што Ён заклікае нас не абмяжоўвацца ў веры, але дазволіць Божай любові пранізваць
і перамяняць усе сферы нашага жыцця.
Пра тое, як у практыцы вера можа перамяняць
не толькі духоўнасць, але і цялеснасць чалавека, мы паразмаўляем у нашай наступнай
перадачы. Няхай добры Бог дапаможа нам выражаць сваю веру усім багаццем душы і цела.