Skllavëri të reja: Akademia Papnore e Shkencave Shoqërore mbledh mjekët në Vatikan
Gjendja aktuale e trafikut të njerëzve dhe skllavëritë moderne, si edhe një plan për
luftën kundër tyre: këto janë dy temat kryesore, në qendër të Konferencës së organizuar
në Vatikan nga Akademia Papnore e Shkencave Shoqërore dhe Federata Botërore e Shoqatave
të Mjekëve Katolikë. Sipas vlerësimeve të Organizatës Botërore të Punës, në periudhën
2002-2010, rreth 21 milion njerëz në botë kanë qenë viktima të punës së detyruar,
sidomos të shfrytëzimit seksual. Çdo vit, rreth 2 milion vetë janë viktima të trafikut
seksual, 60% e të cilave, vajza e gra. Ndërkaq, trafiku i organeve përbën 11% të shifrës
së përgjithshme. Për rezultatet e konferencës, që mbahet sot e nesër, të dëgjojmë
kancelarin e Akademisë Papnore për Shkencat Shoqërore, imzot Marselo Sançez Sorondo: Duam të kuptojmë
shtrirjen e vërtetë të fenomenit, të kemi një ide të përbashkët si Kishë. Ka konferenca
ipeshkvnore si ajo angleze, apo ajo e Guatemalës, që kanë hartuar dokumente për trafikun
e njerëzve, por të tjerat nuk e njohin mirë problemin. Kemi pasur një propozim interesant
nga një mjek, që sugjeron të ruhet ADN-ja e fëmijëve të zhdukur, së bashku me atë
të prindërve, për ta krahasuar. Në fakt, gjëja e parë, që bëjnë trafikantët, është
zhdukja e shenjave të gishtërinjve. Pastaj ka vende me dy faqe: nga njëra anë flasin
për jetën, nga ana tjetër vetë institucionet e tyre nuk duan t’ia dinë për këtë problem.
Mjafton të kujtojmë ç’ndodhi në Bosnjë, ku disa amerikanë merreshin me trafikun e
skllaveve, denoncuar nga një grua amerikane, e cila u pushua më pas nga puna, që kishte
në OKB (rasti Kathryn Bolkovac). Kemi edhe vende, ku prostitucioni njihet si punë:
kështu krijohet treg për trafikun. Për shembull, ky problem është shumë i ndjerë në
Gjermani e në vende të tjera të veriut. Shteti thotë se duhet ndërhyrë, por nga ana
tjetër, nxjerr fitime nga ky shfrytëzim. Edhe Selisë së Shenjtë i kemi kërkuar të
ratifikojë sa më shpejt Protokollin e Palermos, për parandalimin e luftimin e trafikut
të njerëzve, sidomos të grave e fëmijëve. Papa dëshiron t’i sqarojë këto gjëra, prandaj
na nxiti edhe ne të Akademisë të mos merremi me argumente abstrakte, por me probleme
konkrete.