Egjipt: islamistët sulmojnë Kishën e Virgjërës Mari, në Kairo
Sulm i ri mbi një kishë të krishterë në Egjipt. Ngjarja ndodhi të premtën e kaluar,
në Zaitunit, pjesa lindore e Kairos, kur një grup studentësh pranë Vëllezërve Myslimanë
u vërsul kundër kishës së Virgjërës Mari. Grupi, që posa kishte dalë nga lutja e së
premtes në xhaminë aty pranë, u ndesh me disa të rinj të krishterë, që nuk i lejuan
islamistët të hynin në ndërtesën kishtare. Çastet e këtij tensioni të ri u regjistruan
në një video amatorësh, në të cilën shihet qartë vargani i islamistëve që drejtohet
nga kisha duke hedhur parulla kundër patrikut kopto-ortodoks Tavadros. Një të arritur
në treme, të rinjtë islamistë grisën një afishe, vendosur në fasadë të kishës e i
mbushën muret me mbishkrime fyese kundër patrikut, koptëve dhe forcave të armatosura.
Burimet lokale njoftojnë se çdo të premte në mesditë, përkrahësit e Vëllezërve Myslimanë
kalojnë para kishës duke u tallur me të krishterët e duke lëshuar parulla armiqësore
e fyese. E policia arrestoi këto ditë një burrë, që fshihte në shtëpi 108 manifeste
me sharje kundër të krishterëve dhe ushtrisë. Situata mbetet e nderë në të gjithë
Egjiptin, që priti sot për vizitë sekretarin amerikan të shtetit, John Kerry. Kujtojmë
se pas largimit të Morsit nga detyra, SHBA kanë shpenzuar qindra milionë dollarë për
ndihma humanitare në Egjipt.