Ватыканскі кардынал сустрэўся з Патрыярхам Рускай Праваслаўнай Царквы
1 лістападзе 2013
г. у Маскве адбылася сустрэча Патрыярха Маскоўскага і ўсяе Русі Кірыла са старшынёй
на пенсіі Папскай рады па культуры кардыналам Полем Пупарам. Раней у гэты дзень ватыканскі
іерарх прымаў удзел у расійска-італьянскім сімпозіуме па эканамічнай этыцы, прысвечаным
тэме “Карпаратыўная сацыяльная адказнасць у сферы адукацыі”. Кіраўнік Рускай Праваслаўнай
Царквы падкрэсліў важнасць закранутай на сімпозіуме тэмы, адзначыўшы таксама, што
ў цяперашні час у Рускай Праваслаўнай Царкве адукацыйным пытанням надаецца асаблівая
ўвага. Гэта выклікана, у прыватнасці, тым, што хуткія эканамічныя, сацыяльныя і палітычныя
змены ў Расіі, у Еўропе і ў свеце паставілі перад Царквой задачу рэфармавання ўсёй
сістэмы багаслоўскай адукацыі. Патрыярх Кірыл адзначыў, што галоўнай праблемай і галоўным
выклікам з’яўляюцца пытанні пастырскага характару, якія грамадства і індывіды звяртаюць
сёння ў адрас Царквы, перадае прэс-служба Патрыярха Маскоўскага.
У сваю чаргу
кардынал Поль Пупар адзначыў, што Касцёл, звяртаючыся да сферы адукацыі і прадпрымальніцтва
стараецца, у першую чаргу, дапамагчы самому грамадству ў яго правільным развіцці.
Бізнесу неабходна памятаць, што акрамя прыбытку існуюць яшчэ такія паняцці, як адказнасць
і справядлівасць. Толькі тады, калі ўсе грамадскія сілы, у тым ліку і ў сферы эканомікі,
будуць адказна ажыццяўляць сваю дзейнасць у імя справядлівасці, грамадства сапраўды
зможа паспяхова развівацца, лічыць ватыканскі кардынал.
Іерархі пагадзіліся,
што адстойванне этычных прынцыпаў у сацыяльна-эканамічнай сферы з’яўляецца плённай
тэмай для шырокага супрацоўніцтва паміж Рускай Праваслаўнай Царквой і Каталіцкім Касцёлам.