Սպանիոյ վարչապետը բացատրութիւն կը պահանջէ. Միացեալ Նահանգներ Սպանիոյ մէջ մէկ ամսուան
ընթացքին 60 միլիոն հեռաձայնային զրոյց գաղտնալսած են
Պի.Այ.» կը հաղորդէ, որ Սպանիոյ վարչապետ Մարիանօ Ռախոյ իր մօտ կանչած է Սպանիոյ մէջ
Միացեալ Նահանգներու դեսպանը, որպէսզի վերջինս բացատրութիւն տայ այն լուրերուն մասին,
ըստ որոնց, Միացեալ Նահանգներ գաղտնալսած են սպանացիները: Սպանական «Էլ Փայիս» օրաթերթը
հաղորդած էր, որ Միացեալ Նահանգներու Ազգային անվտանգութեան գործակալութիւնը 10 դեկտեմբեր
2012-էն մինչեւ 8 յունուար 2013 երկարող ժամանակաշրջանին Սպանիոյ մէջ շուրջ 60 միլիոն
հեռաձայնային զրոյց գաղտնալսած է: Գաղտնալսումը կատարուած է առանց սպանական իշխանութեան
համաձայնութեան: Վերոնշեալ տեղեկութիւնները ներկայացուցած է բրիտանացի լրագրող Կլեն
Կրինուալտ, որ յօդուածներ կը հրապարակէ Միացեալ Նահանգներու Ազգային անվտանգութեան գործակալութեան
նախկին աշխատակից Էտուըրտ Սնոուտընի տրամադրած փաստաթուղթերուն հիման վրայ: Կը հաղորդուի,
որ Ազգային անվտանգութեան գործակալութիւնը նպատակ չէ ունեցած «գիտնալ հեռաձայնային զրոյցներուն
բովանդակութիւնը, այլ ճշդած է անոնց տեւողութիւնը, բաժանորդներու հեռաձայններուն թիւը
եւ գտնուելու վայրերը»: Եւրոպական Միութեան խորհրդարանական պատուիրակութիւնը Միացեալ
Նահանգներու կողմէ իրենց դաշնակիցները գաղտնալսելու դիւանագիտական գայթակղութեան խորապատկերին
վրայ կը պատրաստուի մեկնիլ Ուաշինկթըն` քննարկումներու համար: Պերլին եւ Փարիզ կը
պահանջեն, որ Եւրոպական Միութեան անդամ 28 երկիրները «առանց լրտեսումներու» համաձայնագիր
ստորագրեն, որուն Մատրիտ մէկ շաբաթ առաջ դէմ էր: «Վրեմիա» կը հաղորդէ, որ Միացեալ
Նահանգներու Ազգային անվտանգութեան գործակալութիւնը դադրեցուցած է գաղտնալսել Գերմանիոյ
վարչապետ Անկելա Մերքելի եւ շարք մը այլ միջազգային ղեկավարներու հեռաձայնային զրոյցները,
երբ Սպիտակ տունը համապատասխան ծրագիրներու գոյութեան մասին տեղեկացած է: «Ուոլ Սթրիթ
Ճըռնըլ» կը գրէ, որ նման տեղեկութեան յայտնուելէն ետք, որոշում տրուած է դադրեցնելու
գաղտնալսումները որոշ ղեկավարներու, ներառեալ` Մերքելի: Օրաթերթը կը նշէ, որ տակաւին
յայտնի չէ, թէ Մերքելէն բացի ուրիշ որու գաղտնալսումը դադրած է: «Ուոլ Սթրիթ Ճըռնըլ»
կը նշէ, որ Միացեալ Նահանգներու նախագահ Պարաք Օպամա իր պաշտօնավարման առաջին հինգ տարիներուն
ընթացքին չէ գիտցած, որ ամերիկեան հետախուզութիւնը կը գաղտնալսէ միջազգային ղեկավարները: Սպիտակ
տան աղբիւրները հաղորդած են, որ Ազգային անվտանգութեան գործակալութիւնը միաժամանակ բազմաթիւ
գործողութիւններ կը կատարէ, եւ պարզապէս կարելի չէ անոնցմէ իւրաքանչիւրին մասին տեղեակ
պահել նախագահը: