Святы Айцец: маліцца адно за аднаго і дзякаваць за малітву Хрысту
Езус працягвае маліцца
і заступацца за нас, паказваючы Айцу кошт нашага збаўлення: свае раны. На гэта звярнуў
увагу папа Францішак падчас Эўхарыстыі ў Доме св. Марты 28 кастрычніка 2013 г. Асновай
для гаміліі Святога Айца стаў фрагмент з Евангелля пра малітву Хрыста перад абраннем
дванаццаці апосталаў. “Езус збіраў сваю каманду”, - пажартаваў Папа і падкрэсліў,
што ў дадзеным евангельскім урыўку прадстаўлены адносіны Езуса з Айцом, апосталамі
і людзьмі: Ён маліўся да Айца за апосталаў і людзей. Але, паводле Папы, працягвае
маліцца таксама і зараз. “Езус нас збавіў, здзейсніў гэту вялікую малітву, прынёс
сваю ахвяру, сваё жыццё, каб нас збавіць, каб апраўдаць: мы ўсе апраўданы дзякуючы
Яму. Зараз Ён адышоў і моліцца. Але што, Езус – гэта дух? Езус, не дух! Езус – гэта
асоба, чалавек, з целам як наша, але праслаўленым. Езус мае раны на руках, на нагах,
на баку і калі моліцца паказвае Айцу кошт нашага апраўдання, моліцца за нас, нібыта
кажучы: “Ойча, няхай гэты не будзе загублены”, - адзначыў Пантыфік.
Паводле
Святога Айца, Хрыстус моліцца за нас, як “наш брат”. “Будзем удзячнымі за тое, што
ў нас ёсць брат, які моліцца за нас, заступаецца”, - заклікаў Папа і дадаў, што, размаўляючы
з Езусам, варта казаць: “Пане, ты мой заступнік, Ты мяне збавіў і апраўдаў, але зараз
маліся за мяне”, і давяраць Хрысту свае праблемы, жыццё, іншыя справы, якія Ён, прадстаўляе
Айцу.