Papa Françesku dënon edhe një herë antisemitizmin, pjellë e diskriminimeve, nga të
cilat vuajnë edhe të krishterët
Kur pakica persekutohet, e gjithë shoqëria është në rrezik e të gjithë duhet ta ndjejmë
këtë problem si tonin: këto ishin fjalët e Papës Françesku, gjatë takimit të sotëm
me një delegacion të Qendrës “Simon Visental”, organizatë ndërkombëtare hebraike për
mbrojtjen e të drejtave të njeriut. Duke dënuar sërish antisemitizmin, Ati i Shenjtë
kujtoi edhe persekutimet e të krishterëve nëpër botë. Takimi i sotëm ishte parashikuar
prej kohësh nga Benedikti XVI, të cilit delegacioni hrebaik i pati kërkuar një audiencë: “Këto takime
janë, nga ana juaj, shenja respekti e vlerësimi për Ipeshkvijtë e Romës, për të cilat
ju falenderoj e të cilave u përgjigjet konsiderata e lartë e Papës për punën tuaj:
lufta kundër çdo forme racizmi, intolerance e antisemitizmi, duke ruajtur kujtimin
e Shoah (Shfarosja e hebrenjve nga nazistët) e duke nxitur mirëkuptimin e ndërsjelltë
përmes formimit dhe impenjimit shoqëror”. Siç ka bërë shpesh javët e fundit,
Papa dënoi sërish, në emër të Kishës Katolike, çdo formë antisemitizmi, duke nënvizuar
se çështja e intolerancës duhet trajtuar në të gjitha përmasat e saj: “Aty
ky çdo lloj pakice persekutohet e mënjanohet për shkak të bindjeve të veta fetare
ose etnike, është në rrezik e mira e gjithë shoqërisë… Mendoj, me dhimbje të madhe,
për vuajtjet, mënjanimin e persekutimin e vërtetë, nga i cili vuajnë jo pak të krishterë
në shumë vende të botës. Le të bashkojmë forcat për të favorizuar kulturën e takimit,
të respektit, të mirëkuptimit e të faljes së ndërsjelltë”. Papa Françesku
nënvizoi rëndësinë e formimit, i kuptuar jo thjesht si transmetim njohurish, por si
përçim i dëshmive të jetuara, të cilat krijojnë një lloj bashkimi e aleance ndërmjet
brezave. Të rinjve, theksoi Ati i Shenjtë, nuk u duhet transmetuar vetëm historia
e dialogut katoliko-hebraik, me gjithë vështirësitë e problemet e veta, por sidomos,
pasioni për ta takuar e për ta njohur tjetrin: “Për këtë, merr rëndësi të madhe
impenjimi i përbashkët në shërbim të shoqërisë e të më nevojtarëve. Ju inkurajoj të
vazhdoni t’u transmetoni të rinjve vlerën e përpjekjeve të përbashkëta për të mos
pranuar mure e për të ndërtuar ura ndërmjet kulturave dhe traditave tona të fesë.
Të ecim përpara me besim, guxim e shpresë. Shalom!”