P. Kovalçik, për 20-vjetorin e Katekizmit të Kishës Katolike: Hyji Atë
Në qendër të reflektimit të 17-të të ciklit kushtuar Katekizmit të ri të Kishës Katolike,
20 vjet pas botimit, është “Hyji Atë”. Pse e quajmë Hyjin Atë e cilat janë tiparet
e Atit të amshuar? Na e shpjegon jezuiti, atë Dariush Kovalçik.
“Besoj në
Hyjin Atë”, dëshmojmë në krye të Besojmës. Po pse duhet ta quajmë Hyjin tonë “Atë”?
Katekizmi na thotë se në Besëlidhjen e Vjetër Hyji quhej “Atë”, falë krijimit të universit
e Besës së lidhur nga Hyji me popullin e Izraelit. Nga njëra anë Atësia Hyjnore është
zanafillë parësore e transhendente, ndërsa nga ana tjetër, kujdes plot dashuri për
njerëzit (cfr KKK 238-239).
Por para së gjithash, ne e quajmë Hyjin
‘Ati ynë’ sepse Jezusi na e zbuloi Hyjin si Atë: “Askush s’mund ta njohë Atin, përveç
Birit e atij, që Biri dëshiron t’ia zbulojë”. (Mt 11, 27). Jezusi na e zbulon
Hyjin, Atin e amshuar, na zbulon vetveten, si Bir i lindur në amshim nga Ati, e
pastaj na zbulon Shpirtin Shenjt, dashuri e amshuar ndërmjet Atit e Birit.
Jezusi
na zbulon edhe se atësia hyjnore ndaj njeriut nuk qëndron vetëm në veprën e krijimit.
Ajo shprehet kryesisht në projektin, që na bën “pjesëtarë të jetës hyjnore” (2
P1,4). Ati tokësor i jep birit natyrën njerëzore, Ati i amshuar dëshiron të na
bëjë pjesëmarrës të natyrës së Tij hyjnore. E ky është për ne Lajmi i Mirë. Shën Pali
pohon se kemi marrë shpirtin e bijve, e “nëse jemi bij, atëherë jemi edhe trashëgimtarë,
trashëgimtarë të Hyjit e bashkëtrashëgimtarë me Krishtin, të thirrur për të marrë
pjesë në lumninë e Tij” (Rm. 8,17). Fakti që Hyji është Atë, nuk ka të bëjë
fare me seksin mashkullor. Hyji Atë nuk është mashkull. Hyji është Hyj. Prej këndej
mund të themi se në atësinë e tij është edhe amësia. Gjon Pali II, duke interpretuar
shembëlltyrën e djalit plangprishës, pati thënë: “Ati i mëshirshëm i shembëlltyrës,
duke u lartuar mbi natyrën njerëzore, përmban në vetvete të gjitha tiparet e atësisë
e të amësisë”. Hyji i amshuar është burim e zanafillë e gjithë atësisë dhe e amësisë
së vërtetë, që i gjejmë në gjithësi.