Laureate e çmimit vjetor “Unaza e Katit”, të edicionit të 42-të të manifestit “Takimet
e Gjeçovit” është drejtoresha e Arkivit Shtetëror të Shqipërisë, Nevila Nika. Në këtë
ngjarje kulturore, letrare e shkencore morën pjesë një numër i madh krijuesish. Organizatorët
e falënderuan drejtoreshën Nika për zbulimin dhe sigurimin e materialit për botimin
e “Abetares së Zymit 1900” së bashku me famulltarin Don Ndue Ballabani. “Unë, gjysmë
jam nga Kosova dhe gjysmë nga Shqipëria. Prindërit e mi në kryeqytetin e Shqipërisë,
në Tiranë, arritën ta realizojnë urën e bashkimit, të cilën shumë individë u munduan
ta rrënojnë. Unë jam rritur duke dëgjuar histori për Kosovën. Kjo tokë e lashtë ka
dhënë shumë. Shpesh na është thënë se ne kemi luftuar vetëm me armë. Jo. Ne kemi ditur
të luftojmë edhe me libër. Këtu u përmend Nënë Tereza dhe At Shtjefën Gjeçovi, miku
më i ngushtë i At Gjergj Fishtës që i këndoi aq bukur këtij vendi arbëror. Vërtet
më keni bërë nder që më keni dhuruar këtë çmim kaq madhështor”, – tha Nika. Në edicionin
e 42-të të këtij manifestimi, një tribunë e veçantë iu kushtua shënimit të 90-vjetorit
të lindjes së artistes së madhe shqiptare Katerina Josipi, e cila gjatë 21 vjetëve
sa punoi në Teatrin Profesional të Prishtinës luajti përkrah artistëve të mëdhenj
si, Bekim Fehmiu, Nexhmije Pagarusha, Muharrem Qena Hyrie Hana, Isref Begolli etj. (nga
shekulli.com)