Պուլկարիա պատ պիտի կառուցէ Թուրքիոյ հետ սահմանին վրայ
ԻԹԱՐ-ԹԱՍՍ կը հաղորդէ, որ Պուլկարիոյ ներքին գործոց փոխնախարար Վասիլ Մարինով յայտարարած
է, որ Պուլկարիոյ կառավարութիւնը հրամայած է երեսուն քիլոմեթր երկարութեամբ պատ կառուցել
Էլխովօ քաղաքին մօտ գտնուող թուրք-պուլկարական սահմանին վրայ, որպէսզի սահմանապահները
կարելիութիւն ունենան բազմապատկելու իրենց աշխատանքին արդիւնաւէտութիւնը: Ան նաեւ
նշած է, որ պատի կառուցումը նպատակ չունի գաղթականները ետդարձի մղելու, որովհետեւ իրենք
այդպիսի քաղաքականութեան կողմ չեն` աւելցնելով, որ պատի կառուցման համար անհրաժեշտ է
շուրջ 2.5 միլիոն եւրօ: Պուլկարական կառավարութիւնը այսօր պիտի գումարէ արտակարգ նիստ
մը, որուն ընթացքին պիտի քննարկէ Միջին Արեւելքէն եւ Հիւսիսային Ափրիկէէն եկած ներգաղթեալներուն
վիճակի վերահսկման համար 13.5 միլիոն եւրօ յատկացնելու հարցը: Ըստ Պուլկարիոյ ներքին
գործոց նախարարութեան տուեալներուն, Պուլկարիոյ տարածքին մէջ կը գտնուին 6500 գաղթականներ: