Papa Françesku pret luteranët: T’i kërkojmë falje njëri-tjetrit e të përparojmë në
dialogun ekumenik
Të vijojmë rrugën tonë të “dialogut e të bashkimit”, u tha Papa Françesku luteranëve
në audiencën e paradites me delegacionin e Federatës Luterane Botërore dhe me përfaqësuesit
e komisionit për bashkimin luterano-katolik. Papa theksoi se, pavarësisht nga vështirësitë
dhe mospërkimet, nuk duhet të heqim dorë nga angazhimi dhe nga lutja për bashkim. Dialogu
teologjik, lutja me besnikëri dhe bashkëpunimi vëllazëror: këto janë tri pikat që
Papa Françesku mendon se janë themelore, për të përparuar në dialogun dhe në marrëdhëniet
mes luteranëve dhe katolikëve. Duke vënë theksin tek “ekumenizmi shpirtëror”, Ati
i Shenjtë tha: “Ky përbën, si me thënë, shpirtin e ecjes sonë drejt bashkimit të
plotë, dhe na lejon të shijojmë që tani ndonjë fryt të tij, edhe pse jo krejtësisht
të pjekur. Në atë masë në të cilën i afrohemi me shpirt të përvuajtur Zotit tonë Jezu
Krishtit, jemi të sigurt se afrohemi edhe me njëri-tjetrin dhe, në atë masë në të
cilën do t’i kërkojmë Zotit dhuratën e bashkimit, të jemi të sigurt se Ai do të na
marrë për dore e do të jetë prijësi ynë”. Pastaj Papa kujtoi dy përvjetore domethënës:
50-vjetorin e dialogut teologjik dhe, mbi të gjitha, pesëqindvjetorin e reformës në
2017. Është e rëndësishme, shtoi Papa, “të ballafaqohemi, përmes dialogut, rreth realitetit
historik të Reformës, rreth rrjedhojave të saj e përgjigjeve që iu dhanë”: “Katolikë
e luteranë mund të kërkojnë falje për të këqijat që i kanë bërë njëri-tjetrit dhe
për fajet që kanë para Hyjit. Së bashku mund të gëzohen për nostalgjinë për bashkim,
që Zoti ka zgjuar në zemrat tona, dhe për faktin se Ai në bën të shikojmë përpara
me shpresë”. Në dritën e rrugës së bërë gjatë këtyre dekadave dhe të “shembujve
të shumtë të bashkësisë vëllazërore mes luteranëve e katolikëve”, vijoi Papa, “jam
i sigurt se do të dimë ta çojmë përpara dialogun dhe bashkimin”. Këtë, tha Papa, mund
ta bëjmë “duke u përballur edhe me çështjet themelore, sikurse edhe me mospërkimet
që lindin në fushën antropologjike dhe etike”:
“Sigurisht, vështirësitë nuk
mungojnë e nuk do të mungojnë. Do të ketë ende nevojë për dialog, për mirëkuptim të
ndërsjellë, por nuk duhet të kemi frikë! E dimë mirë – sikurse na e ka përsëritur
disa herë Benedikti XVI – se bashkimi nuk është pikë së pari fryt i përpjekjeve tona,
por i veprimit të Shpirtit të Shenjtë. Atij duhet t’ia hapim zemrat me besim, që të
na prijë në rrugët e pajtimit dhe të bashkimit”.