Святы Айцец сустрэўся
19 кастрычніка 2013 г. з мецэнатамі мастацтва Ватыканскіх музеяў. Група “Patrons of
the Arts in the Vatican Museums” падтрымлівае захаванне і ўвекавечанне ўнікальнай
калекцыі твораў мастацтва, якія належаць да ватыканскіх фондаў. Сёлета асацыяцыя адзначае
30-годдзе свайго існавання. “За апошнія тры дзесяцігоддзі Мецэнаты ўнеслі выдатны
ўклад у аднаўленне шматлікіх скарбаў мастацтва, якія захоўваюцца ў калекцыі Ватыкана
і, у боль шырокім сэнсе, у здзяйсненне рэлігійнай, мастацкай і культурнай місіі музеяў”,
- сказаў папа Францішак, дзякуючы “ад усяго сэрца” энтузіястам мастацтва. Пантыфік
лічыць, што стварэнне гэтай унікальнай групы было натхнёна не толькі пачуццём адказнасці
за спадчыну Касцёла і захаванне сакральнага мастацтва, але і “жаданнем распаўсюджвання
духоўных і рэлігійных ідэалаў”.
Ва ўсе часы Касцёл, нагадаў Папа, заклікаў
мастацтва дэманстраваць прыгажосць веры і абвяшчаць Евангельскае пасланне пра веліч
Божага тварэння, пра годнасць чалавека, створанага на Яго вобраз і падабенства, пра
сілу смерці і ўваскрасення Хрыста, Які прынёс адкупленне і адраджэнне ў свет, крануты
трагедыяй граху і смерці. Ватыканскія музеі, падкрэсліў Святы Айцец, даюць магчымасць
незлічоным пілігрымам і турыстам сустрэць гэта пасланне праз творы мастацтва, якія
сведчаць аб духоўных памкненнях чалавецтва, узнёслых таямніцах хрысціянскай веры і
пошуку вышэйшай прыгажосці, якая мае сваю крыніцу і выкананне ў Богу.
Пантыфік
пажадаў сабраным у Клементыйскай зале, каб іх мецэнацтва было ўдзелам у духоўным жыцці
і місіі Касцёла і выразам надзеі на прышэсце Валадарства, чыіх прыгажосці, гармоніі
і міру чакае кожнае чалавечае сэрца.
Асацыяцыя “Мецэнаты мастацтва Ватыканскіх
музеяў” – гэта міжканфесійная група, якая імкнецца да аднаўлення, захавання і пашырэння
мастацкай спадчыны Ватыканскіх музеяў і распаўсюджвання ведаў аб іх культурных і духоўных
мэтах. Група была заснавана ў 1983 г. пасля таго, як буйная выстава з Ватыкана наведала
Нью-Ёрк, Лос-Анджэлес і Чыкага.