Papa pret “Patrons of Arts”: Kisha i drejtohet artit për të shprehur bukurinë e fesë
Veprat e Muzeve të Vatikanit dëshmojnë aspiratat shpirtërore të njerëzimit. Kështu
pohoi, sot paradite, Papa Françesku, në audiencën me “Patrons of Arts”, një bashkësi
ndërkombëtare bamirësish, të cilët, që prej 30 vjetësh, mbështesin ekonomikisht projektet
për ruajtjen dhe restaurimin e kryeveprave, të ekspozuara në Muzetë e Vatikanit. Kisha,
nënvizoi Ati i Shenjtë, i është drejtuar gjithnjë artit për të shprehur bukurinë e
fesë: “Në çdo epokë, Kisha i është drejtuar artit për të shprehur bukurinë e
fesë e për të shpallur mesazhin ungjillor të madhështisë së krijimit të Zotit, të
dinjitetit të njeriut, krijuar në shembëlltyrë e në përngjasim me Të, e të pushtetit
të vdekjes mundur nga ringjallja e Krishtit, që sjell shëlbim e rilindje në një botë,
karkaterizuar nga tragjedia e mëkatit dhe e vdekjes”. Muzetë e Vatikanit, me
historinë e tyre të pasur, vazhdoi Papa Françesku, u japin mundësinë shtegtarëve të
shumtë, që vijnë në Romë, për t’u takuar me këtë mesazh, përmes veprave të artit,
që dëshmojnë misteret sublime të fesë së krishterë dhe kërkimin e asaj bukurie të
shkallës sipërore, që e ka zanafillën e plotësimin e vet vetëm tek Zoti. Mbështeja
juaj për ruajtjen e këtyre veprave, u tha Ati i Shenjtë anëtarëve të “Patrons of Arts”,
qoftë shenjë e pjesëmarrjes suaj në jetën dhe misionin e Kishës: “Qoftë edhe
shprehje e shpresës sonë në ardhjen e asaj Mbretërie, bukuria, harmonia e paqja e
së cilës priten nga çdo zemër njerëzore e janë frymëzim për aspiratat më të larta
artistike të racës njerëzore”.