Վատիկանի մէջ Սրբ. Գրիգոր Լուսաւորիչի նուիրուած ցուցահանդէսը մեծ հետաքրքրութիւն յառաջացուցած
է
Վատիկանի մէջ Սուրբ Աթոռի Քարտուղարութեան Պալատին մէջ Ս. Գրիգոր Լուսաւորիչի կեանքին
եւ գործունէութեանը նուիրուած ցուցադրութիւնը իտալական լրատուամիջոցներու ուշադրութեան
կեդրոնին կը գտնուի: Հայաստանի Հանրապետութեան դեսպանութեան հաստատուելուն առիթով բացուած
ցուցահանդէսը մեծ հետաքրքրութիւն յառաջացուցած է: Այս մասին կը հաղորդէ «Արմէնփրես»-ը`
վկայակոչելով «Հռոմ ռիփորթս»-ի կայքը: Փաստաթղթերու սեւ եւ սպիտակ լուսապատճէններով ցուցադրութիւնը
կը ներկայացնէ Լուսաւորիչի կենսագրութիւնը` իբրեւ Հայ առաքելական եկեղեցւոյ հիմնադիր
եւ Հայաստանը` որպէս աշխարհի մէջ քրիստոնէութիւնը առաջինը ճանչցած պետութիւն: Սրբ.
Գրիգորին կ’երկրպագէ ինչպէս Հայ առաքելական, այնպէս եւ Կաթողիկէ եկեղեցին: Վատիկանի Սրբ.
Պետրոս պազիլիք եկեղեցւոյ արտաքին պատի որմնախորշին մէջ 2005-ին դրուեցաւ անոր յուշարձանը,
իսկ 2000-ին Սրբ. Յովհաննէս Պօղոս II պապը սուրբ Գրիգորի մասունքներ նուիրեց Հայ կաթողիկէ
եկեղեցւոյ: «Կաթողիկէ եկեղեցին բազմաթիւ սուրբ Գրիգորներ ունի, բայց այս ցուցահանդէսի
անակնկալը պիտի ըլլայ հայկական սուրբ Գրիգորի բացայայտումը: Ցուցահանդէսին երկրորդ հատուածը
պիտի նուիրուի Գրիգոր Լուսաւորիչի սուրբ մասունքներու տարածման պատմութեան եւ անոր ներկայութեան
Պոլիսի, Հռոմի եւ այլուր»,- նշած է Սուրբ Աթոռի մէջ ՀՀ դեսպանի օգնական Վարդան Կարապետեան: Սուրբ
Աթոռին մէջ ՀՀ դեսպանատան կազմակերպած ցուցահանդէսին նպատակն է ոչ միայն ընդգծել Սրբ
Գրիգոր Լուսաւորիչի ժառանգութեան մեծ կարեւորութիւնը, այլեւ ՀՀ եւ պապական քաղաք-պետութեան`
Վատիկանի միջեւ դիւանագիտական յարաբերութիւններու նոր էջը: 2013-ի Ամրան Վատիկանի
մէջ բացուեցաւ Հայաստանի Հանրապետութիւն առաջին դեսպանատունը: