Любіць Святога Айца,
разумець яго місію і ўдзельнічаць у ёй праз сродкі камунікацыі – гэта, паводле меркавання
кс. Фэдэрыка Ламбардзі, місія Ватыканскага тэлевізійнага цэнтра. Гэта ўстанова адзначыць
22 кастрычніка 30-годдзе свайго існавання. Цяперашні кіраўнік Залы Друку Апостальскай
Сталіцы і Ватыканскага радыё, а ў мінулым дырэктар тэлецэнтра, перакананы, што супрацоўнікі
ўстановы глыбока разумеюць значэнне падзей, якія яны рэалізуюць у тэлевізійным фармаце.
Толькі той, хто любіць Папу, здольны знайсці вымярэнне і спосаб, каб дакладна перадаць
сэнс і змест яго місіі, лічыць святар.
З нагоды 30-годдзя тэлецэнтра 18 кастрычніка
2013 г. у Рыме пройдзе шэраг мерапрыемстваў. Адным з іх стане канферэнцыя, на якой
будуць падведзены вынікі шматгадовай працы ўстановы і прадстаўлены яе перспектывы.
Святы Айцец і Прэзідэнт Італіі скіруюць да ўдзельнікаў форума свае спецыяльныя пасланні.
Упершыню адбудзецца паказ відэаматэрыялаў, знятых у фармаце ультравысокай якасці.
17
кастрычніка газета “L’Osservatore Romano” змясціла на сваіх старонках урывак з кнігі
“Тэлекамеры св. Пятра. 30 гадоў Ватыканскаму тэлевізійнаму цэнтру”, аўтарам якой з’яўляецца
дырэктар гэтай установы, кс. прэлат Дарыё Вігано. У матэрыяле ён нагадаў, што ідэя
стварэння тэлецэнтра належыць бл. Яну Паўлу ІІ, чалавеку адкрытаму на мас-медыя і
свет. Папа палічыў, што Ватыкану для камунікацыі недастаткова мець толькі радыё, неабходны
таксама тэлевізійны фармат – у выніку 22 кастрычніка 1983 г. быў адкрыты Ватыканскі
тэлецэнтр.
Кс. Вігано прызнаўся, што тэлевізійны цэнтр займаецца не толькі
здымкамі падзей з удзелам Папы, але таксама стварае паўнавартасныя праграмы і дакументальныя
стужкі. На думку святара, галоўныя выклікі, якія на сённяшні дзень стаяць перад установай,
тычацца яго пастаяннай тэхналагічнай мадэрнізацыі, а таксама абнаўлення спосабу і
эстытыкі перадачы здымачнага матэрыялу.