Ati i Shenjtë: “Të krishterët ideologjikë" janë sëmundje e rëndë, e mbyllin portën,
që çon tek Jezusi
Nëse një i krishterë bëhet dishepull i ideologjisë, e ka humbur fenë. Këtë nënvizoi
sot paradite Papa Françesku gjatë Meshës, kremtuar në Shtëpinë e Shën Martës. Ati
i Shenjtë i ftoi të krishterët të rrinë larg sjelljes së njeriut me çelës në xhep
e portë të mbyllur. Ripohoi, prandaj, se kur njeriu nuk lutet, largohet nga feja dhe
bie në ideologji e moralizëm.
“Mjerë ju, o mësues të ligjit! Ju e morët çelësin
e dijes: vetë nuk hytë e i penguat edhe ata, që deshën të hyjnë!”. Papa Françesku
e shtjelloi homelinë, duke ndjekur paralajmërimin e Jezusit, për të cilin fliste Ungjilli
i sotëm. Aktualizoi këtë qortim: “Kur ecim rrugës e ndodhemi para një kishe të mbyllur,
pohoi, ndjejmë në shpirt diçka të çuditshme, sepse një kishë e mbyllur nuk mund të
kuptohet. Nganjëherë, nënvizoi, na japin gjithfarë shpjegimesh, që nuk janë të tilla:
janë pretekste, përligjje, por realiteti është se kisha është e mbyllur e njerëzit,
që kalojnë para saj, nuk mund të hyjnë. Por ka edhe më keq: “Zoti, që është brenda,
nuk mund të dalë”. Sot, vijoi Papa, Jezusi na flet pikërisht për këtë figurë të mbylljes,
simbol i të krishterëve, që e kanë kyçin në dorë, por nuk e përdorin, nuk e hapin
portën. Madje veprojnë edhe më zi, ndalen në prag, zënë portën e nuk i lënë as të
tjerët të hyjnë. Mbeten jashtë, ata vetë e të tjerët. Kjo, vërejti Ati i Shenjtë,
është pasojë e mungesës së dëshmisë së krishterë; e e keqja arrin kulmin, kur i krishteri,
që ka zënë portën, është meshtar, ipeshkëv ose edhe papë. “Por, pyeti natyrshëm Papa
Françesku, si është e mundur që i krishteri të sillet kështu, me çelësin në xhep
e portën e mbyllur?”: “Feja, thënë figurativisht, kalon nëpër lambik e bëhet
ideologji. E ideologjia nuk e ka forcën e thirrjes. Në ideologji nuk është Jezusi:
ngrohtësia e Tij, dashuria, butësia. Ideologjitë janë të serta, gjithnjë. E kur i
krishteri bëhet dishepull i ideologjive, do të thotë se e ka humbur fenë: nuk është
më dishepull i Jezusit, është dishepull i kësaj sjelljeje, i këtij mendimi, i këtij....
Prandaj Jezusi u thotë atyre: ‘Ju e morët çelësin e dijes’. Njohja e Jezusit shndërrohet
në një njohje tjetër, edhe moralistike, sepse ata e mbyllnin portën me shumë rregulla
e urdhërime” Jezusi, vijoi Papa, thotë: “Vaj medet për ju, mësues të ligjit,
sepse u ngarkoni njerëzve barrë, që mezi mund të mbarten, nësa ju, as me gisht të
dorës nuk i prekni”. Ky është, pra, procesi shpirtëror e mendor, i atij që do ta ketë
çelësin në xhep e portën mbyllur: “Feja bëhet ideologji. E ideologjia të tremb,
ideologjia i dëbon njerëzit, i largon. Largon njerëzit nga Kisha e Kishën nga njerëzit.
Sëmundje e rëndë, kjo e të krishterëve ideologjikë. Sëmundje, por jo e re, apo jo?
Nis që nga koha e Shën Gjonit Apostull i cili, në Letrën e tij të parë, flet pikërisht
për këtë lëngatë. Të krishterët humbasin fenë e kapen pas ideologjive. Bëhen të sertë,
moralistë, eticistë, por pa kurrfarë mirësie. Atëherë nuk mund të mos pyesim: ‘Po
pse arrin deri në këtë pikë besimtari i krishterë? Ç’ndodh në zemrën e këtij të krishteri?
Të këtij prifti, të këtij ipeshkvi, të këtij pape, që katandiset kështu?’. Thjesht
një gjë: ky i krishterë nuk lutet. E nëse nuk lutesh, ti s’bën tjetër, veçse të mbyllësh
portën”. Çelësi, që hap portën e fesë, vijoi Papa, është pikërisht lutja. E
në vijim nënvizoi se kjo ndodh kur i krishteri nuk lutet. Atëherë dëshmia e tij është
fodulle. Kush nuk lutet, është mendjemadh, kryelartë, i sigurt në vetvete. Nuk është
i përvuajtur. Kërkon të ngjitet lart e më lart. Ndërsa, pohoi me forcë Papa, kur i
krishteri lutet, nuk largohet nga feja, flet me vetë Jezusin. Them, saktësoi Ati i
Shenjtë, lutet, jo lutje, sepse dhe doktorët e ligjit thoshin shumë lutje, për shihni
botë. Kurse Jezusi thotë: “Kur lutesh, shko në dhomën tënde e lutju Atit fshehtësisht,
nga zemra, në zemër. Një gjë është të lutesh, vijoi Papa, e tjetër, të thuash lutje: “Këta
nuk luten, e braktisin fenë, e shndërrojnë në ideologji moralistike, rastësore, pa
Jezusin. E kur një profet a një i krishterë i mirë i qorton, bëjnë atë, që bënë edhe
kundër Jezusit: ‘Kur doli nga tempulli, skribët e farizejtë nisën ta sulmojnë ashpër-
këta idelogjikët janë armiqësorë - e t’i bëjnë shumë pyetje, duke i ngritur leqe për
ta zënë pisk në ndonjë fjalë, që delte prej gojës së Tij’. Nuk janë transparentë.
Fshehin gjithnjë diçka të dyshimtë. Eh, varfanjakët, janë njerëz të njollosur me marrëzinë
e madhështisë. T’i lypim Zotit hirin të mos pushojmë kurrë së luturi, për të mos e
humubur fenë, të jemi gjithnjë të përvuajtur. E kështu nuk do të bëhemi njerëz të
mbyllur, që ia mbyllin udhën Zotit”.